မိုးကုတ်မြို့နယ်တွင် တိုက်ပွဲဖြစ်ပွားခြင်းမရှိဘဲ စစ်ကောင်စီတပ်မှ ဂျက်လေယာဥ် ၂စီးဖြင့် ဗုံးကြဲခဲ့ သဖြင့် ဘုန်းကြီးကျောင်းနှင့် လူနေအိမ် တစ်လုံး ထိခိုက်ပျက်စီး
D Day News
ဇွန်လ ၂၀
တအာင်းပြည် တပ်မဟာ(၂)စစ်ဒေသ၊ မိုးကုတ်မြို့နယ်၊ ဟိုဝိတ်ကျေးရွာတွင် တိုက်ပွဲဖြစ်ပွားခြင်း မရှိဘဲ စစ်ကောင်စီတပ်မှ ဂျက်တိုက်လေယာဉ် ၂ စီးဖြင့် ဗုံးကျဲတိုက်ခိုက်ခဲ့သဖြင့် ဘုန်းကြီးကျောင်း နှင့် လူနေအိမ်တစ်လုံး ထိခိုက်ပျက်စီးခဲ့ကြောင်း TNLA သတင်းနှင့် ပြန်ကြားရေးဌာနက ထုတ်ပြန် ထားသည်။
ယနေ့ ဇွန်လ ၂၀ ရက် ညနေ ၄ နာရီ ၅၅ မိနစ်အချိန်က မိုးကုတ်မြို့နယ်၊ ဟိုဝိတ်ကျေးရွာတွင် တိုက်ပွဲ ဖြစ်ပွားခြင်းမရှိပဲ အကြမ်းဖက်စစ်ကောင်စီတပ်က ဂျက်လေယာဥ် ၂ စင်းဖြင့် လာရောက်ဗုံးကြဲတိုက် ခိုက်ခဲ့ရာ ဟိုဝိတ်ဘုန်းတော်ကြီးကျောင်းနှင့် နေအိမ်တစ်အိမ် ထိခိုက်ပျက်ဆီးခဲ့ပြီး ဒေသနေ ပြည်သူ တစ်ဦး ထိခိုက်ဒဏ်ရာရရှိခဲ့ကြောင်း သိရသည်။
ထို့အတူ ယနေ့ နံနက် ၈ နာရီခန့်က နောင်ချိုမြို့နယ်၊ အုမ္မတီးရွာ တပ်စွဲထားသည့် စစ်ကောင်စီ တပ်က ဆမ္မဆယ်ကျေးရွာသို့ လက်နက်ကြီးဖြင့် ၄ လုံး ပစ်ခတ်ခဲ့ကြောင်း သိရသည်။
ယမန်နေ့ ဇွန်လ ၁၉ ရက် ညနေ ၅ နာရီ မိနစ် ၃၀ အချိန်ကလည်း မိုးကုတ်မြို့နယ်၊ ဖြူရောင်ကျေးရွာ တွင် တပ်စွဲထားသည့် စစ်ကောင်စီတပ်မှ (45)mm လက်နက်ကြီး အမျိုးအစားဖြင့် ဆလောင်တောင် အနီးသို့ ၄ လုံးနှင့် ညနေ ၅ နာရီ ၈ မိနစ်အချိန်တွင် ညောင်ကုန်းရွာသို့ ၂ လုံး ပစ်ခတ်ခဲ့ကြောင်း သိရ သည်။
ဇွန်လ ၁၈ ရက်နေ့မှ ဇွန်လ ၂၀ ရက်နေ့အထိ ၃ ရက်အတွင်း စစ်ကောင်စီတပ်က ဂျက်လေယာဥ်နှင့် ဒရုန်းဖြင့် ဗုံးကြဲတိုက်ခိုက်မှု၊ လက်နက်ကြီးပစ်ခတ်မှုများကြောင့် တအာင်းတပ်မတော် PSLF/TNLA တပ်ဖွဲ့ဝင် ၃ ဦးအသက်ပေးလှူခဲ့ရပြီး ၄ ဦး ထိခိုက်ဒဏ်ရာရရှိခဲ့ကြောင်း သိရသည်။
ထို့အပြင် ဒေသနေပြည်သူ အသက် ၁၀ နှစ်အရွယ် ကလေးငယ်တစ်ဦးအပါအဝင် ၄ ဦး ထိခိုက် ဒဏ် ရာ ရရှိခဲ့ပြီး နေအိမ် ၃ လုံးနှင့် ဘုန်းတော်ကြီးကျောင်းများ ထိခိုက်ပျက်ဆီးခဲ့ကြောင်း သိရသည်။
D Day News
