တကောင်းဘက်သို့ စစ်ကူတက်လာသော ပျူစောထီးကားများကို အသင့်စောင့်ကြိုတိုက်ခိုက်မှု ၇ ဦး သေဆုံး ၊ ချောင်းကြီးရွာမှ ရာအိမ်မှူး ၃ ဦးကို ရွာထဲအထိဝင်ရောက်ဖမ်းဆီး (ရုပ်သံ)
D Day News
မတ်လ ၂၈
မန္တလေးတိုင်း၊ သပိတ်ကျင်းမြို့နယ်၊ ကျောက်ဖြူကျေးရွာ မြောက်ဘက်တွင် စစ်ကူပေးရန် တက်လာ သော ပျူများနှင့် စစ်ကူပေးရန်ထွက်လာသော ပျူများကို ပစ်ခတ်တိုက်ခိုက်ခဲ့ရာ ၇ ဦးသေဆုံးခဲ့ ကြောင်း ဗိုလ်လင်းယုန်တပ်ဖွဲ့ထံမှ သိရသည်။
မတ်လ ၂၅ ရက်နေ့က မတ္တရာမြို့နယ်ဘက်မှ တကောင်းမြို့ဘက်သို့ စစ်ကူပေးရန် ပျူစောထီးများ တင်ဆောင်လာသည့် စစ်ကား ၄ စီးကို တိုက်ခိုက်ရန် သပိတ်ကျင်းမြို့နယ်၊ ကျောက်ဖြူကျေးရွာ၏ မြောက်ဘက် ကတ္တရာလမ်းနှင့်မီတာ ၇၀၀ အနီး၌ ပြည်သူ့ကာကွယ်ရေးပူးပေါင်းတပ်ဖွဲ့မှ စစ် ကြောင်း ၂ ကြောင်းဖြင့် အသင့်နေရာယူစောင့်ဆိုင်းခဲ့ကြောင်းသိရသည်။
ထို့သို့ စောင့်ဆိုင်းနေစဉ် နံနက် ၁၁ နာရီ ၁၀ မိနစ်အချိန်၌ ယင်းအကြမ်းဖက်စစ်ကားများကို စစ် ကြောင်း ၁ မှ လက်နက်ကြီး၊ လက်နက်ငယ်များဖြင့် တရစပ်ပစ်ခတ်တိုက်ခိုက်ခဲ့ရာ စစ်ကားများ ဘီးပေါက်၍ ထိုးရပ်သွားခဲ့ကြောင်း သိရသည်။
ယင်းစစ်ကားများ ရပ်တန့်သွားစဉ် စစ်ကြောင်း ၂ မှ လက်နက်ကြီး၊ လက် နက်ငယ်များဖြင့် မိနစ် ၃၀ ခန့်ပစ်ခတ်တိုက်ခိုက်ခဲ့ရာ ကားပေါ်ပါ စစ်သား၊ ပျူစောထီးများမှာ ကား ပေါ်က ခုန်ချထွက်ပြေးသွား သည်အထိ ရုန်းရင်းဆန်ခတ်ဖြစ်သွားခဲ့ပြီး စစ်သား ၇ ဦး သေဆုံးကာ ၄၀ ခန့် ထိခိုက်ဒဏ်ရာရရှိခဲ့ပြီး ကား ၂ စီးလည်း ပျက်စီးခဲ့ကြောင်း သိရသည်။
https://youtu.be/8kabxchxODE
တိုက်ပွဲဖြစ်ပွားနေချိန်တွင် သပိတ်ကျင်းမြို့နယ်၊ ရေထွက်ကျေးရွာ စစ်ကောင်စီထောက်တိုင် မန်းစိန် ဆိုက်ထဲမှ ပျူများက စစ်ကူပေးရန် တိုက်ရိုက်ထွက်မလာပဲ အခြားနေရာများသို့ ကွေ့ပတ်သွားလာ ပြီး မှ တိုက်ပွဲဖြစ်ပွားရနေရာကို တရစပ်ရမ်းသမ်းပစ်ခတ်ခဲ့ကြောင်း သိရသည်။
ထို့အပြင် သပိတ်ကျင်းမြို့နယ် ချောင်းကြီးကျေးရွာ စစ်ကောင်စီခန့် ရာအိမ်မှူး ၃ ဦးကို စစ်သား များ အထိုင်ချထားသည့် ချောင်းကြီးကျေးရွာလယ်ခေါင်အထိ ဝင်ရောက်ဖမ်းဆီးခဲ့ကြောင်း ဗိုလ်လင်းယုန် တပ်ဖွဲ့က ထုတ်ပြန်ထားသည်။
အဆိုပါ တိုက်ခိုက်ဖမ်းဆီးမှုများကို မင်းခစစ်ကြောင်းနှင့် ဗိုလ်လင်းယုန်တပ်ဖွဲ့ – သပိတ်ကျင်းတိုက် နယ် ပကဖ တို့ ပူးပေါင်းကာ တိုက်ခိုက်ခဲ့ခြင်းဖြစ်ကြောင်း သိရသည်။
