နောင်ချိုမြို့နယ်၊ တောင်ခမ်းကျေးရွာအနီးတဝိုက်ကို စစ်တပ်က ဓာတုအဆိပ်ငွေ့ဗုံးများဖြင့် အသုံးပြု တိုက်ခိုက်မှု တော်လှန်ရေးတပ်ဖွဲ့ဝင်များ ဓာတုအဆိပ်သင့်ပြီး မူးဝေအော့အန်ဝေဒနာခံစားခဲ့ရ
သံလွင်မြန်မာသတင်း
ဧပြီလ ၂၂
ရှမ်းပြည်နယ်မြောက်ပိုင်း၊ နောင်ချိုမြို့နယ်၊ တောင်ခမ်းကျေးရွာအနီးတဝိုက်ကို အကြမ်းဖက် စစ် ကောင်စီတပ်က လေကြောင်းဖြင့် ဓာတုအဆိပ်ငွေ့ဗုံးကြဲချ တိုက်ခိုက်ခဲ့ရာ တော်လှန်ရေးတပ်ဖွဲ့ဝင် အချို့ ဓာတုအဆိပ်သင့်ပြီး မူးဝေအော့အန်ဝေဒနာခံစားခဲ့ရကြောင်း ဓနုပြည်သူ့လွတ်မြောက်ရေးတပ် မတော် – DPLA ကထုတ်ပြန်သည်။
ဧပြီလ ၂၀ ရက် မွန်းလွဲ ၁ နာရီခန့်တွင် နောင်ချိုမြို့နယ်၊ တောင်းခမ်းကျေးရွာအနီး တဝိုက် ရှိ ဓနု ပြည်သူ့လွတ်မြောက်ရေး တပ်မတော် -DPLA နှင့် မဟာမိတ်TNLA တပ်ဖွဲ့ဝင်များ လှုပ်ရှားရာ နေရာ ကို အကြမ်းဖက်စစ်ကောင်စီတပ်က လေကြောင်းဖြင့် ဓာတုအဆိပ်ဓာတ်ငွေ့ဗုံး ၃ လုံး၊ ညနေ ၃ နာရီ ၆ မိနစ်တွင် ဓာတုအဆိပ်ဗုံး ၄ လုံးအသုံးပြု၍ ကျဲချတိုက်ခိုက်ခဲ့ကြောင်း သိရသည်။
ထိုသို့ ဓာတုအဆိပ်ငွေ့ဗုံးများဖြင့် ကျဲချတိုက်ခိုက်မှုကြောင့် အဆိပ်ငွေ့ရှူရှိုက်မိသောရဲဘော်များမှာ မူးဝေ အော့အန်ခြင်း ၊ သွေးပေါင်ချိန်ကျခြင်း ဝေဒနာများခံစားခဲ့ရကြောင်း သိရသည်။
အကြမ်းဖက်စစ်ကောင်စီသည် အပစ်အခတ်ရပ်စဲထားကြောင်း ကြေညာထားသော်လည်း နိုင်ငံတ ကာမှ တားမြစ်ထားသော အဆိပ်ဓာတ်ငွေ့ဗုံးများကို အသုံးပြု၍ အကြိမ်ကြိမ် တိုက်ခိုက်လျက်ရှိ တောင်းခမ်းတွင်သာမက အခြားတော်လှန်ရေးတပ်များ ရှိသောနေရာများတွင်လည်း မကြာခဏ တိုက်ခိုက်နေသည်ကို တွေ့မြင်နေရကြောင်း DPLA က ပြောဆိုထားသည်။
တောင်းခမ်းကျေးရွာတွင် စစ်ကောင်စီတပ်မှ လေယာဥ်ဖြင့် ဗုံးများကျဲချခြင်း၊ လက်နက်ကြီးများပစ် ခတ်ခြင်းနှင့် အဆိပ်ဓာတ်ငွေ့ဗုံးများ အသုံးပြု၍ ထိုးစစ်ဆင်ပြုလုပ်နေမှုကြောင့် TNLA ၊ DPLA တပ် တို့နှင့် စစ်ကောင်စီတပ်များကြား ယနေ့အချိန်ထိ တိုက်ပွဲဆက်လျက်ဖြစ်ပွားလျက် ရှိနေကြောင်း သိရသည်။
Thanlwin Myanmar Media
