အနောက်မြောက်တိုင်းစစ်ဌာနချုပ် -နမခ တပ်အတွင်းသို့ ရော့ကတ် ၁၀ လုံးဖြင့် ပစ်ခတ်တိုက်ခိုက်မှု အရာရှိ ၅ ဦးအပါအဝင် စစ်သား ၁၂ ဦးသေဆုံးပြီး ရိက္ခာဂိုဒေါင် ၂ လုံးပြိုကျပျက်စီး

သံလွင်မြန်မာသတင်း

အောက်တိုဘာလ ၇

စစ်ကိုင်းတိုင်း၊ မုံရွာမြို့အခြေစိုက် အနောက်မြောက်တိုင်း စစ်ဌာနချုပ် -နမခ တပ်အတွင်းသို့ ရော့ ကတ်လက်နက်ကြီး ၁၀ လုံးဖြင့် ပစ်ခတ်တိုက်ခိုက်ခဲ့ရာ အရာရှိ ၅ ဦးအပါအဝင် စစ်သား ၁၂ ဦး သေဆုံးခဲ့ပြီး ရိက္ခာဂိုဒေါင် ၂ လုံးပြိုကျ ပျက်စီးခဲ့ကြောင်း Chindwin Rocket Brother (CRB) ထံမှ သိရသည်။

အောက်တိုဘာလ ၂ ရက် နေ့က မုံရွာမြို့အခြေစိုက် အနောက်မြောက်တိုင်းစစ်ဌာနချုပ် (နမခ) အ တွင်း သို့ Chindwin Rocket Brother (CRB) တပ်ဖွဲ့မှ ဦးဆောင်ပြီး သီတင်းကျွတ်အကြို အဖြစ် ရော့ ကတ် လက်နက်ကြီးဖြင့် ၁၀ လုံးပစ်ခတ်တိုက်ခိုက်ခဲ့ရာ ပစ်မှတ်များကို ထိမှန်ပေါက်ကွဲခဲ့ကြောင်း သိရသည်။

ထိုသို့ တိုက်ခိုက်မှုအတွင်း စစ်တိုင်းရုံးမှ အရာရှိ ၅ ဦးအပါအဝင် ၁၀ ဦး၊ ရိက္ခာဂိုဒေါင်စောင့် စစ်သား ၂ ဦး တို့ ပွဲချင်းပြီး သေဆုံးကာ ကျန်ဒဏ်ရာရရှိသူများကို တပ်မတော်ဆေးရုံခွဲ ၄/၃၀၀ သို့အရေးပေါ် ပို့ ဆောင်ခဲ့ကြောင်း၊ ထို့အပြင် ရိက္ခာဂိုဒေါင် ၂ လုံးလည်း ပြိုကျပျက်စီးခဲ့ကြောင်း သိရသည်။

“ထိချက်ကောင်းတယ်၊ သူတို့ဘက်က ပြန်ပစ်တာရှိပါတယ်။ ၄ လုံးပြန်ပစ်တာ၊ ပြည်သူတွေရော၊ ရဲဘော်တွေရော အကုန်လုံး အထိအခိုက်မရှိပါဘူး။ မိဘပြည်သူတွေအနေနဲ့ တော်လှန်ရေးအဖွဲ့တွေ ကို ကူညီထောက်ပံ့ပေးကြပါလို့ ပြောချင်ပါတယ်” ဟု ချင်းတွင်းရောကတ်ညီနောင် (Chindwin Rocket Brother – C.R.B) တပ်ဖွဲ့မှ တာဝန်ရှိသူတစ်ဦးက ပြောကြားသည်။

အဆိုပါ တိုက်ခိုက်မှုကို ချင်းတွင်းရောကတ်ညီနောင် (Chindwin Rocket Brother – C.R.B) ဦး ဆောင်၍ မဟာမိတ်အဖွဲ့များ ဖြစ်သော ချိုမိုင်မိုင် (ကနီ)၊ Chindwin Brother ၊ Budalin Defense Force ၊ Bandula Defense Force ၊ Federal Democratic Force၊Burmer Army ၊ မုံရွာ ခရိုင်တပ် ရင်း ၁၄ ဗိုလ်လက်ကောက် နှင့် ယင်မာပင်ခရိုင် အမှတ် ၉ တပ်ရင်းတို့ ပူးပေါင်းကာ တိုက်ခိုက်ခဲ့ခြင်း ဖြစ်ကြောင်း သိရသည်။