သံလွင်မြန်မာသတင်း
ဩဂုတ်လ ၃၁
စစ်ကိုင်းတိုင်း၊ မြင်းမူမြို့နယ်၊ မုံရွာ-မန္တလေးလမ်းမပေါ်တွင် စစ်ကား ၂ စီးကို ပစ်ခတ်တိုက်ခိုက်ခဲ့ရာ စစ်သား ၁၃ ဦးသေဆုံးပြီး လက်နက် ၂ လက်သိမ်းဆည်းရရှိခဲ့ကြောင်း Black Eagle Defence Force – MMU တပ်ဖွဲ့က ထုတ်ပြန်သည်။
ယမန်နေ့ ဩဂုတ်လ ၃၀ ရက် နံနက် ၆ နာရီခန့်က မြင်းမူမြို့နယ်၊ မုံရွာ-မန္တလေးလမ်းမပေါ်ရှိ မြောင် လမ်းခွဲ၌ တပ်စွဲထားသော အကြမ်းဖက်စစ်သား ၂၅ ခန့်ပါ စစ်ကား ၂ စီးကို ပြည်သူ့ကာကွယ်ရေးတပ် ဖွဲ့ဝင်များက မုံရွာ -မန္တလေးလမ်းပိုင်းတနေရာမှ အသင့်စောင့်ကြိုတိုက်ခိုက်ခဲ့ရာ စစ်သား ၁၃ ဦး ၁၃ ဦး သေဆုံးပြီး ရှေ့မှ ထွက်လာသောကားမှာ လုံးဝပျက်စီးသွားကြောင်း သိရသည်။
ထိုသို့ တိုက်ခိုက်မှုအတွင်း သေဆုံးဒဏ်ရာရရှိပြီး မသေသေးသော စစ်သား ၃ ဦးက ပြန်လည် ခုခံ တိုက်ခိုက်နေသောကြောင့်လည်းကောင်း၊ မြင်းမူမြို့မှ စစ်ကား ၂ စီးဖြင့် စစ်ကူရောက်ရှိလာသော ကြောင့် လည်းကောင်း MA-11 အမျိုးအစား သေနတ် ၂ လက် နှင့် ကျည်ဘောက် ၁ ခု ၊ အီနာဂါ ဗုံး ၁ လုံးတို့ ကိုသာ ကောက်ယူ သိမ်းဆည်းနိုင်ခဲ့ပြီး ပြန်လည်ဆုတ်ခွာခဲ့ရကြောင်း သိရသည်။
အဆိုပါစစ်ဆင်ရေးကို မြင်းမူမြို့နယ် ပ.က.ဖ တပ်ဖွဲ့ ဦးဆောင်၍ Black Eagle Defence Force (MMU) ၊ စစ်ကိုင်းခရိုင်တပ်ရင်း (၁) တပ်ခွဲ (၂) ၊ အလ္လကပ္ပတိုက်နယ်တပ်ဖွဲ့၊ တောချောင်းဦး တိုက်နယ်တပ်ဖွဲ့နှင့် မြင်းမူမြို့နယ်ပ.လ.ဖ တပ်ဖွဲ့တို့ ပူးပေါင်းကာ တိုက်ခိုက်ခဲ့ခြင်းဖြစ်ပြီး ပြည်သူ့ ကာကွယ်ရေး တပ်ဖွဲ့ဝင် တစ်ဦး ခြေထောက် ကျည်ထိမှန် ဒဏ်ရာရရှိခဲ့ကြောင်း သိရသည်။
Thanlwin Myanmar Media
