ကောလင်းမြို့နယ်၊ ဒို့ပင်ရွာအနီးကို စစ်တပ်က လေကြောင်းဖြင့် ဗုံးကြဲတိုက်ခိုက်မှု ကလေးတစ်ဦး အပါအဝင် ၄ ဦး ဒဏ်ရာရရှိကာ ဆီဘောက်ဆာကား ၂ စီး၊ ထမင်းဆိုင်တစ်ဆိုင် မီးလောင်ပျက်စီး
သံလွင်မြန်မာသတင်း
ဇူလိုင်လ ၁၅
စစ်ကိုင်းတိုင်း၊ ကောလင်းမြို့နယ်၊ ဒိုးပင်ရွာအနီးကို စစ်ကောင်စီတပ်က လေကြောင်းဖြင့် ဗုံးကြဲ တိုက်ခိုက်ခဲ့ရာ ကလေးငယ် တစ်ဦးအပါအဝင် ၄ ဦးဒဏ်ရာရရှိပြီး ဆီဘောက်ဆာကား ၂ စီး၊ ထမင်းဆိုင်တစ်ဆိုင် မီးလောင်ပျက်စီးခဲ့ကြောင်း ကောလင်းမြို့နယ်ပြည်သူ့ကာကွယ်ရေးတပ်ဖွဲ့ထံမှ သိရသည်။
ဇူလိုင်လ ၁၄ ရက် ညနေ ၄ နာရီ ၃၈ မိနစ်က ကောလင်းမြို့နယ် အရှေ့ခြမ်း၊ ဒိုးပင်ရွာအနီး တနေရာ သို့ အကြမ်းဖက်စစ်ကောင်စီ၏ တံတားဦးလေတပ်မှ တက်လာသော ဂျက်ဖိုက်တာ တစ်စီးဖြင့် ဗုံးကြဲ တိုက်ခိုက်ခဲ့ကြောင်း သိရသည်။
ထိုသို့ ဗုံးကြဲတိုက်ခိုက်မှုကြောင့် ကလေးငယ် ၁ ဦး၊ အမျိုးသမီး ၁ ဦးနှင့်အမျိုးသား ၂ ဦး ဒဏ်ရာရရှိပြီး ၁ ဦးမှာ အပြင်းအထန်ဒဏ်ရာရရှိခဲ့ခြင်းဖြစ်ကြောင်း၊ ထို့အပြင် ဆီဘောက်ဆာ ကား ၂ စီး၊ ထမင်း ဆိုင် ၁ ဆိုင်နှင့် အခြားနီးစပ်ရာ ပစ္စည်းများစွာ ထိခိုက်ပျက်စီးဆုံးရှုံးခဲ့ကြောင်း သိရသည်။
အကြမ်းဖက်စစ်ကောင်စီတပ်က ပြည်သူလူထုနေထိုင်ရာ ကျေးရွာများ၊ စစ်ဘေးရှောင်စခန်းများ၊ ဘုန်းကြီးကျောင်းများနှင့် စာသင်ကျောင်းများကို ပစ်မှတ်ထားကာ လေကြောင်းဖြင့် ဗုံးကြဲတိုက်ခိုက် သောကြောင့် မိဘပြည်သူများအနေဖြင့် လေကြောင်းရန်ကာကွယ်ရေးဆိုင်ရာ နည်းလမ်းများကို လိုက်နာကျင့်သုံးကြပါရန်နှင့် လေကြောင်းရန် ကာကွယ်နိုင်သည့် ဗုံးခိုကျင်းများ ခိုင်ခိုင်မာမာ တူးထားကြပါရန် တော်လှန်ရေးအဖွဲ့အစည်းများက တိုက်တွန်းထားသည်။
Thanlwin Myanmar Media
