ချင်းတွင်းမြစ်ကြောင်းအတိုင်း ဆန်တက်လာသောစစ်သင်္ဘောများကို မိုင်းဆွဲပစ်ခတ်တိုက်ခိုက်မှု ထိခိုက်သေဆုံးမှုရှိ (ရုပ်သံ)
သံလွင်မြန်မာသတင်း
ဇူလိုင်လ ၁၁
စစ်ကိုင်းတိုင်း၊ မုံရွာမြို့နယ်၊ ချင်းတွင်းမြစ်ကြောင်းတနေရာတွင် စစ်တပ်သင်္ဘောများကို မိုင်းဆွဲပြီး လက်နက်ကြီး၊ လက်ငယ်များဖြင့် တိုက်ခိုက်ခဲ့ရာ ထိခိုက်သေဆုံးမှုရှိကြောင်း Brave Heart Army – BHA တပ်ဖွဲ့ထံမှ သိရသည်။
ဇူလိုင်လ ၈ ရက်မွန်းတည့် ၁၂ နာရီခန့်က ချင်းတွင်းမြစ်ကြောင်းအတိုင်း ဆန်တက်လာသည့် စစ် သင်္ဘော ၃ စီး၊ တွဲတွန်း ၂၉ စီးပါ သင်္ဘောရေယာဉ်တန်းကို မုံရွာမြို့နယ်၊ ချင်းတွင်းမြစ်ကြောင်း တနေ ရာမှ အသင့်စောင့်ကြို၍ ရှေ့ထွက်မိုင်း ၄ လုံးပွိုင့် ၆ ပွိုင့်ခွဲပြီး ဖောက်ခွဲပြီး လက်နက်ကြီး၊ လက်နက် ငယ်များဖြင့် ဝိုင်းဝန်ပစ်ခတ်တိုက်ခိုက်ခဲ့ကြောင်း သိရသည်။
ထိုသို့ တိုက်ခိုက်မှုအတွင်း စစ်ကောင်စီတပ်သားများ ထိခိုက်သေဆုံးမှုရှိနိုင်သော်လည်း အတိအကျ သိရှိနိုင်ရန် စုံစမ်းနေဆဲဖြစ်ကြောင်း၊ စစ်ကောင်စီတပ်သားများက လက်နက်ကြီး၊ လက်နက်ငယ်မျိုးစုံ ဖြင့် ပြန်လည် ပစ်ခတ်မှုရှိခဲ့ကြောင်း သိရသည်။
အဆိုပါ တိုက်ခိုက်မှုကို ChindwinFighterGroup(CFG) ၊ Brave Heart Army-(B.H.A)တပ်ဖွဲ့၊ ဗန္ဓုလနှင့် အဖွဲ့သားများ ပူးပေါင်းကာ တိုက်ခိုက်ခဲ့ခြင်းဖြစ်ပြီး ပြည်သူ့ကာကွယ်ရေးတပ်ဖွဲ့ဝင်များ အထိအခိုက်မရှိ ပြန်လည် ဆုတ်ခွာနိုင်ခဲ့ကြောင်း သိရသည်။
မိဘပြည်သူများအနေဖြင့် စစ်အာဏာရှင်စနစ်အမြန်ဆုံး နိဂုံးချုပ်နိုင်ရေးအတွက် မလျော့သော ဇွဲဖြင့် ဆက်လက်ပူးပေါင်းပါဝင်ပေးကြပါရန် အထူးမေတ္တာရပ်ခံထားသည်။
Thanlwin Myanmar Media
