မုံရွာမြို့နယ်၊ မအူစစ်တပ်ဂိတ်အနီး၌ စစ်ယာဉ်တန်းကို မိုင်းဆွဲတိုက်ခိုက်မှု အရာရှိတစ်ဦးအပါအဝင် ၃ ဦး သေဆုံး
သံလွင်မြန်မာသတင်း
ဇွန်လ ၁၃
စစ်ကိုင်းတိုင်း၊ မုံရွာမြို့နယ်၊ မအူစစ်တပ်ဂိတ်အနီးတွင် အကြမ်းဖက်စစ်ယာဉ်တန်းကို မိုင်းဆွဲ တိုက် ခိုက်ခဲ့ရာ အရာရှိတစ်ဦးအပါအဝင် စစ်သား ၃ ဦးသေဆုံးခဲ့ကြောင်း Brave Heart Army – BHA တပ်ဖွဲ့ထံမှ သိရသည်။
ယမန်နေ့ ဇွန်လ ၁၂ ရက်ညနေ ၅ နာရီ ၄၀ မိနစ်က စစ်ကိုင်းတပ်မ ၃၃ မှ ထွက်လာသော ကြေးနီ တင်ကား ၁၉ စီး ၊ သံပြား ကာ ကား ၈ စီး ၊ မိုးကာအုပ် ၆ ဘီးကား ၃ စီးတို့ ပါယာဉ်တန်းကို မုံရွာ-မန်းလေးလမ်းမကြီးပေါ်၊ မုံရွာမြို့အဝင် မအူစစ်တပ်ဂိတ်အနီး၌ ကားတန်းအနက် ၁၀ စီးမြောက် ကားကို ပဒေသာမိုင်း ၅ လုံး ဖြင့် မိုင်းဆွဲတိုက်ခိုက်ပြီး လက်နက်ကြီး၊ လက်နက်ငယ်များဖြင့် ဝိုင်းဝန်းပစ်ခတ်တိုက်ခိုက်ခဲ့ကြောင်း သိရသည်။
“ဒီနေ့မနက်ထပ်သိရတာက ၃ ဦးသေတာ၊ ဆေးရုံရောက်မှာ တစ်ဦးထပ်သေတာ၊ မုံရွာမြို့ထဲကနေ ထွက်လာပြီးတော့ မအူဂိတ်၊ မအူဂိတ်ကနေဖြစ်စဉ်ဖြစ်တဲ့နေရာကို ရောက်လာတာ၊ ဖြစ်စဉ်ဖြစ်တဲ့ နေရာကနေမှ မအူဂိတ်၊ မအူဂိတ်ကနေမှ မုံရွာမြို့ထဲကို သယ်သွားတာပါ။ ကျနော်တို့ဘက်က ရဲဘော် တွေအားလုံး အထိအခိုက်မရှိခဲ့ပါဘူး။ ကျနော်တို့မှာ ကျည်လိုအပ်နေလို့ ကျည်ဖိုးလေးကူညီ ပေးကြပါ အုံးလို့ပြောချင်တယ်ပါတယ်” ဟု Brave Heart Army – BHA တပ်ဖွဲ့မှ တာဝန်ရှိသူ တစ်ဦးက ပြောကြားသည်။
ထိုသို့ တိုက်ခိုက်မှုအတွင်း အရာရှိတစ်ဦးအပါအဝင် စစ်သား ၂ ဦးသေဆုံးပြီး အများအပြား ဒဏ်ရာ ရရှိကာ သံပြားကာ ကား ၁ စီးနှင့်ကြေးနီတင်ကား ၂ စီးလည်းပျက်စီးခဲ့ကြောင်း၊ တိုက်ခိုက်ခံရပြီး နောက် နာရေးကား ၁ စီး၊ အိမ်စီးကား ၁ စီး၊ သံပြားကာ ကား ၁ စီးဖြင့် သေဆုံးဒဏ်ရာရရှိသူများကို လာရောက်သယ်ဆောင်သွားပြီး ဒဏ်ရာရရှိသူများကို မုံရွာမြို့သို့သယ်ဆောင်သွားကြောင်း သိရ သည်။
အဆိုပါ တိုက်ခိုက်မှုကို Brave Heart Army – BHA ၊ Golden Target Force.GTF နှင့် Chindwin Fighter Group.CGF တို့ ပူးပေါင်းကာ တိုက်ခိုက်ခဲ့ခြင်းဖြစ်ပြီး လက်နက်ခဲယမ်းများ လိုအပ်လျက် ရှိသောကြောင့် မိဘပြည်သူများအနေဖြင့် တတ်နိုင်သမျှပါဝင်ကူညီပေးကြပါရန် မေတ္တာရပ်ခံ တိုက် တွန်းထားသည်။
Thanlwin Myanmar Media
