စစ်ကိုင်းမြို့အထွက်၌ ဆက်ကြေးကောက်နေသော စစ်သားများကို မိုင်းဆွဲ တိုက်ခိုက်မှု စစ်သား ၂ ဦး သေဆုံး၊ စစ်တပ်က ပစ်ခတ်မှုကြောင့် ပြည်သူ ၁ ဦး သေဆုံး
သံလွင်မြန်မာသတင်း
ဇွန်လ ၃
စစ်ကိုင်းတိုင်း၊ စစ်ကိုင်းမြို့အထွက် ကောင်းမှုတော်ဘုရားအနီးတွင် ဆက်ကြေးကောက်နေသော စစ်သားများကို မိုင်းဆွဲ တိုက်ခိုက်ခဲ့ရာ စစ်သား ၂ ဦးပွဲချင်းပြီး သေဆုံးခဲ့ကြောင်း Burmese Revolution Force – BRF တပ်ဖွဲ့ထံမှ သိရသည်။
ဇွန်လ ၁ ရက် ညနေ ၄ နာရီခန့်က စစ်ကိုင်းမြို့၊ ကောင်းမှုတော်ဘုရားအနီး စစ်ကိုင်း – ရွှေဘို ခရိုင် ချင်း ဆက်လမ်း ပေါ်တွင် လုံခြုံရေးကင်းယူကာ ခရီးသွားပြည်သူများ၏ ကားများကို ဆက်ကြေး ကောက် နေသော စစ်သား ၁၂ ဦးခန့်ကို Burmese Revolution Force – BRF တပ်ဖွဲ့မှ ရဲဘော်များ က မိုင်း ၂ လုံးဖြင့် ဖောက်ခွဲတိုက်ခိုက်ခဲ့ရာ စစ်သား ၊ ပျူ ၂ ဦးပွဲချင်းပြီးသေဆုံးပြီး ၃ ဦး အပြင်းအထန် ဒဏ်ရာရရှိခဲ့ကြောင်း သိရသည်။
“စခအရာရှိကြီးတစ်ဦး ကောင်းမှုတော်လာမှာမို့ ကင်းစောင့်ရင်း ဆက်ကြေးကောက်နေကြတာ၊ အဲဒီ နေရာမှာက ကားတွေကိုချောဆွဲတာ၊ ငွေညစ်တာတွေလည်း လာလာလုပ်တတ်ကြတယ်၊ တပ်မ ၃၃ ကနေ ထွက်လာပြီးတော့ လမ်းဘယ်ညာမှာကား ၃ စီးရပ်ထားပြီးတော့ ကင်းစောင့်နေကြတာပါ၊ အ နည်းဆုံး ၁၂ ယောက်လောက်ကျော်မယ်၊ အဲဒီစခတွေကို မိုင်းဆွဲခဲ့တာပါ။ ၂ ဦးကတော့ တစ်ခါ တည်း သေတယ်၊ သေတဲ့အထဲမှာ ၃ ပိုင်းပြတ်သွားတာ တစ်ဦးပါတယ်၊ ၃ ယောက်ဒဏ်ရာရတယ်” ဟု Burmese Revolution Force – BRF တပ်ဖွဲ့မှ တာဝန်ရှိသူ တစ်ဦးက ပြောကြားသည်။
ထိုသို့ မိုင်းဆွဲတိုက်ခိုက်ခံရပြီးနောက် တပ်မ ၃၃ အတွင်းမှ စစ်ကားများဖြင့် ထွက်လာပြီး လမ်းပေါ်၌ သွားနေသော ကားတစ်စီးကို ပစ်ခတ်ခဲ့ရာ ကားစပယ်ယာ တစ်ဦးသေဆုံးခဲ့ကြောင်း သိရသည်။
မေလ ၃၀ ရက်နေ့က စစ်ကိုင်းတပ်မ ၃၃ မှ လက်နက်ကြီးများဖြင့် ပစ်ခတ်မှုကြောင့် Burmese Revolution Force – BRF ရဲဘော်တစ်ဦး ကျဆုံးခဲ့ကြောင်း၊ စစ်ကောင်စီတပ်၏ လက်နက်ကြီး ပစ် ခတ်မှုကြောင့် ကျဆုံးခဲ့ရမှုကို လက်စားချေသည့်အနေဖြင့် မိုင်းဆွဲတိုက်ခိုက်ခဲ့ခြင်းဖြစ်ပြီး စစ်အာရှင် အမြစ်ပြတ်ရေးဆက်လက်တိုက်ပွဲဝင်သွားမည်ဖြစ် ကြောင်း အသိပေးထားသည်။
Thanlwin Myanmar Media
