ကဗျာ ကဏ္ဍ “ဗန့်ကျီသွေး “
ပျိုးကြဲလက်
နန်းလှစ်စတွင် ၊ သပိတ်ဆင်၍
လိုအင်ဆန္ဒ ၊ ပြခဲ့ကြလည်း
သပိတ်ဖြိုခွဲ ၊ ထင်တိုင်းကြဲကာ
အော်ဆဲသတ်ဖြတ် ၊ အာဏာငတ်သော်
သတ်မှတ်တာဝန် ၊ မကျေပွန်၍
လူလွန်မသား ၊ ဗာလများကို
ထောင်ထားခွံထိုး ၊ တူမီးမျိုးနှင့်
ဆတိုးထွင်ပြီ ၊ တော်လှန်ပြီကွယ့်
ဗန့်ကျီသွေးတို့ ရဲသလေ့လေ့ ။
ဆန်းသစ်လသွင် ၊ ရေးရေးထင်ဘိ
ပြည်ခွင်အရေး ၊ ပေါက်နှင့်ကျေးက
ရောထွေးဆက်စပ် ၊ အနေကျပ်သော်
နေရပ်တခွင် ၊ သတိဝင်လျှက်
စစ်ဆင်စစ်ထိုး ၊ စစ်ပွဲတိုးလျှင်
မီးကျိုးမောင်းပျက် ၊ ကိုယ့်လက်နက်မှာ
တုဖက်ရင်ဆိုင် ၊ မယှဉ်နိုင်၍
ဖြိုင်ဖြိုင်မျက်ရည် ၊ ကျရပြီကွယ့်
ညံ့ချီသေးလို့ လွဲသလေ့လေ့ ။
လမ်းဖြစ်စထွင် ၊ လက်လုပ်ဆင်၍
နောင်တွင်မမ ၊ မိုင်းဆွဲကြလျှက်
နောက်မဆုတ်တမ်း ၊ ဝုန်းဒိုင်းကြမ်းပြီ
အောင်လမ်းကိုချီ ၊ အောင်တေးသီလျက်
အောင်ပြီဟစ်ကြွေး ၊ စစ်ချီတေးနှင့်
ချွေးဒီးဒီးကျ ၊ မြေသို့ခစေ
သားလှစုံသည် ၊ ငါတို့ပြည်၏
ခန့်ထည်ရေးမို့ ခဲသလေ့လေ့ ။ ။
ပျိုးကြဲလက်
ရေးသားချိန် = ၂၀၂၂ ခုနှစ်၊ နိုဝင်ဘာ ၂၇ ရက် ည ၁၁ နာရီ ၅၆ မိနစ်
D Day News
