ကဗျာကဏ္ဍ “အာဏာရှင်နိဂုံး”
ပျိုးကြဲလက်
လက်ဝယ်အာဏာ ၊ ရှိခဲ့ပါမူ
ဥစ္စာဂုဏ်သိန် ၊ ရောင်ဝါထိန်၍
စိန်ကျောက်ပမာ ၊ ဘုန်းလျှံဖြာမည်
ဝမ်းသာပီတိ ၊ ဂွမ်းဆီထိ ။
ဘုရင်တမျှ ၊ သမ္မတ၏
စလွယ်ရင်ဖုံး ၊ ဆင်ယင်ထုံးက
ချစ်မုန်းမလို ၊ ဘာမဆိုစေ
ငါ့ကိုယ်ကျိုးရှိ ၊ လုပ်ရဲ၏ ။
မုဒိမ်းဓားပြ ၊ လူသတ်မှသည်
စောရလုယက် ၊ မီးရှို့ဖက်ကို
ကွန်ချက်ပြပေး ၊ မူးယစ်ဆေးနှင့်
လူ့သွေးနင်းလျှက် ၊ ပလ္လင်တက်သော် ။
ပလ္လင်ထက်မှာ ၊ ပြည့်အာဏာက
လေဟာနယ်လား ၊ တိမ်စိုင်သားသို့
ဝေဝါးချုပ်ပျောက် ၊ တစ္ဆေခြောက်ပြီ
ငါရောက်ခဲ့ရာ ၊ နန်းတော်သာလည်း
အာဏာဆိတ်သုဉ်း ၊ ပြည်သူမုန်း၏ ။
ပြည်သူ့အာဏာ ၊ မပိုင်ရာကို
ငါ့မှာမျှော်ကိုး ၊ ဖလံမျိုးသို့
ကိုယ်ကျိုးနည်းရ ၊ လောင်မီးကျသည်
ဘဝနိဂုံး ၊ အမှောင်ဖုံး၍
ပျောက်ဆုံးရပြီ ၊ ရှုံးရပြီတကား ။ ။
ပျိုးကြဲလက်
ရေးသားချိန် – မြန်မာစံတော်ချိန် ည ၁၁ နာရီ မိနစ် ၃၀
၂၀၂၃ ခုနှစ်၊ ဇန်နဝါရီလ ၂၉ ရက်
D Day News
မှတ်ချက်များ ပေးခဲ့နိုင်ပါတယ်...
