ခွန်းနီ (ပခုက္ကူ)
လေယာဥ်ပျံတွေ
ဒရုန်းတွေနဲ့
ဗုံးတွေပဲ သယ်လို့ ရတာလား
အပြုံးတွေ သယ်လာပြီး ကြဲချကြည့်လိုက်
ကမ္ဘာဟာ ထင်ထားတာထက် ပိုလှနေမှာ။
စစ်တွေ မဖြစ်ဘဲ
အချစ်တွေသာ စစ်နေခဲ့ရင်
မေတ္တာတရားနဲ့ ကိုယ်ချင်းစာတရားဟာ
စွယ်တော်ရွက်တွေလို စိမ်းလန်းနေမှာ
ရှိရှိသမျှပန်းတွေလို အစွမ်းကုန်လှနေမှာ။
အာဏာရှင်တွေသာ မပေါ်ပေါက်ခဲ့ရင်
ကြမ္မာငင်နေတဲ့ ကမ္ဘာကြီးကို
ငါတို့အတူတူ ကယ်တင်လို့ရနိုင်တယ်။
အခုများတော့ ငါတို့မှာ
ကိုယ့်အသက်ကိုယ် ပြန်ကယ်နေရ
ကိုယ့်ဘဝကိုယ် ပြန်ဆယ်နေရ
ကိုယ့်ဖိစီးမှုကိုယ် ပြန်သယ်နေရတယ်။
ကယ်ပါ ယူပါ
ကယ်ကြ ဆယ်ကြ
အို…..
ရှိရှိသမျှ
လောကပါလတို့။
ခွန်းနီ (ပခုက္ကူ)
Thanlwin Myanmar Media
မှတ်ချက်များ ပေးခဲ့နိုင်ပါတယ်...
