သံလွင်မြန်မာသတင်း
ဩဂုတ်လ ၂၉
ထိုင်း -မြန်မာနယ်စပ်ရှိ စစ်ဘေးရှောင်စခန်းတစ်ခုတွင်နေထိုင်သော စစ်ဘေးရှောင်မြန်မာပြည်သူများ ကို တရားဝင်အလုပ်လုပ်ခွင့်ပေးသည့်အပေါ် ကျေးဇူးတင်ကြောင်း NUG နိုင်ငံခြားရေးဝန်ကြီး ဒေါ်ဇင် မာအောင်က ထိုင်းဘုရင်မင်းမြတ်နှင့် ထိုင်းနိုင်ငံအစိုးရထံသို့ သဝဏ်လွှာပေးပို့ခဲ့ကြောင်း သိရသည်။
ယနေ့ ဩဂုတ်လ ၂၇ ရက်နေ့တွင် ထိုင်းဘုရင်မင်းမြတ်နှင့် ထိုင်းနိုင်ငံအစိုးရထံသို့ အမျိုးသားညီညွတ် ရေး အစိုးရ၊ နိုင်ငံခြားရေးဝန်ကြီးဌာန၊ ပြည်ထောင်စုဝန်ကြီး ဒေါ်ဇင်မာအောင်က ကျေးဇူးတင် ကြောင်း သဝဏ်လွှာပေးပို့ခဲ့ခြင်းဖြစ်ပြီး အမျိုးသားညီညွတ်ရေးအစိုးရအနေဖြင့်လည်း မြန်မာစစ် ဘေးရှောင်ပြည်သူများ၊ ရွှေ့ပြောင်းအလုပ်သမားများနှင့်ပတ်သက်ပြီး လိုအပ်သည့်လူသားချင်း စာနာ ထောက်ထားမှုဆိုင်ရာ အကူအညီများအား ထိုင်းနိုင်ငံအစိုးရနှင့်အတူလက်တွဲဆောက်ရွက်ရန် အသင့်ရှိကြောင်းထည့်သွင်း ဖော်ပြထားသည်။
ဩဂုတ်လ ၂၆ ရက်နေ့က ထိုင်း-မြန်မာ နယ်စပ်တလျှောက်တွင် ၁၀ စုနှစ်များစွာကြာ ယာယီခိုလှုံနေ ထိုင်ခဲ့ကြသော မြန်မာဒုက္ခသည်များကို ထိုင်းနိုင်ငံအတွင်း တရားဝင် အလုပ်လုပ်ကိုင်ခွင့်ပြုရန် စီမံ ချက် အသစ်တစ်ရပ်ကို ထိုင်းအစိုးရက ခွင့်ပြုခဲ့ခြင်းဖြစ်ပြီး အဆိုပါ အစီအစဉ်အရ အလုပ်လုပ်ကိုင်ခွင့် လက်မှတ် ၄၂,၀၀၀ ခန့် ထုတ်ပေးရန် ပြင်ဆင်ထားကြောင်း သိရသည်။
ထိုင်းအစိုးရက မြန်မာ ဒုက္ခသည်များကို သတ်မှတ်ထားသော ထိန်းချုပ်နယ်မြေများ၏ ပြင်ပတွင် နေ ထိုင်ခွင့်ပြုလိုက်သည့်အပြင် အလုပ်အကိုင်ရရှိရန် အလုပ်သမားဝန်ကြီးဌာနက ခွင့်ပြုချက်ပေးလိုက် ပြီဖြစ်ကြောင်း သိရသည်။
ထိုသို့ ထိုင်းနိုင်ငံအစိုးရ၏ ထိုင်း-မြန်မာနယ်စပ်ရှိ ယာယီခိုလှုံရေးစခန်းများတွင် နေထိုင်သောမြန်မာ စစ်ဘေးရှောင်ပြည်သူများကို တရားဝင်အလုပ်လုပ်ကိုင်ခွင့်ပေးရန် ခွင့်ပြုခဲ့သည့်ကိစ္စနှင့်ပတ်သက်၍ အမျိုးသားညီညွတ်ရေးအစိုးရ၊ နိုင်ငံခြားရေးဝန်ကြီးဌာန၊ ပြည်ထောင်စုဝန်ကြီး ဒေါ်ဇင်မာအောင်က အမျိုးသားညီညွတ်ရေးအစိုးရနှင့် မြန်မာပြည်သူများ ကိုယ်စား ထိုင်းဘုရင်မင်းမြတ်နှင့် ထိုင်းနိုင်ငံ အစိုးရ ထံသို့ ကျေးဇူးတင်ကြောင်း သဝဏ်လွှာပေးပို့ခဲ့ခြင်းဖြစ်သည်။
Thanlwin Myanmar Media
