မုံရွာမြို့တော်ခန်းမကို လုံခြုံရေးယူပေးသည့် စစ်တပ် အထိုင်စခန်းကို ဒရုန်းဖြင့် ဗုံးကျဲတိုက်ခိုက် (ရုပ်သံ)
D Day News
ဧပြီလ ၁၃
စစ်ကိုင်းတိုင်း၊ မုံရွာမြို့တော်ခန်းမကိုလုံခြုံရေးယူပေးနေသည့် အကြမ်းဖက်စစ်တပ် အထိုင်စခန်းကို ဒရုန်းဖြင့် ဗုံးကျဲတိုက်ခိုက်ခဲ့ကြောင်း မုံရွာခရိုင်အမှတ် ၄ တပ်ရင်း – Chindwin Attack Force ထံမှ သိရသည်။
ယနေ့ ဧပြီလ ၁၃ ရက် နံနက် ၈ နာရီ ၄၅ မိနစ်အချိန်မှ စတင်ပြီး မုံရွာမြို့၊ မြို့တော်ခန်းမကို တပ်စွဲ ထားသော အကြမ်းဖက်စစ်တပ် အထိုင်စခန်းကို Fixed Wing Drone များဖြင့် ဗုံးသီး ၆ လုံး ကျဲချ တိုက်ခိုက်ခဲ့ရာ အကြမ်းဖက်စစ်သားများ ထိခိုက်သေဆုံးမှုရှိပြီး လူနာတင်ကား ၂ စီးဖြင့် လာရောက် သယ်ဆောင်သွားကြောင်း၊ ယင်းတိုက်ခိုက်မှုအတွင်း ဒရုန်း ၄ စီး ပျက်စီးဆုံးရှုံးခဲ့ကြောင်း သိရသည်။
https://youtu.be/Kh-YCzsvtvE
“မြို့တော်ခန်းမကို ကျဲချတာမဟုတ်ပါဘူး။ အထိုင်စခန်းက အမှတ် ၁ ရဲစခန်းနဲ့ကပ်လျက်မှာရှိတာ၊ စစ်ရေးအဓိက နေရာနဲ့ စစ်ခွေးကား အဓိကနေရာတွေကို ကျဲချခဲ့တာ။ မြို့တော်ခန်းမကို လုံခြုံရေး ယူပေးနေတဲ့ အထိုင်စခန်းပါ” ဟု မုံရွာခရိုင်အမှတ် ၄ တပ်ရင်း – Chindwin Attack Force မှ တာဝန်ရှိသူ တစ်ဦးက ပြောကြားသည်။
အဆိုပါ တိုက်ခိုက်မှုကို မုံရွာခရိုင်ပြည်သူ့ကာကွယ်ရေးတပ်မတော်(Chindwin Attack Force) တပ် ရင်း ၄ ၊ မုံရွာခရိုင်ပြည်သူ့ကာကွယ်ရေး တပ်မတော်တပ်ရင်း ၄ အထူးကွန်မန်ဒိုတပ်ဖွဲ့ (Monywa The Boys) ၊ မုံရွာခရိုင် ပြည်သူ့ကာကွယ်ရေးတပ်မတော်တပ်ရင်း ၄ တပ်ခွဲ (၂) 5/ Commando Force ၊ Special Guerillary Force Monywa၊ မုံရွာခရိုင်တပ်ရင်း ၁၂ တပ်ခွဲ ၄ မီးတောက်တပ်ခွဲ ၊ မုံရွာခရိုင်တပ်ရင်း ၂၃ တပ်ခွဲ ၅ Midlane New Generation Defence Force ၊ Monywa Brave Hearts (LPDF) ၊ Sun King Envoy Monywa(LPDF) ၊ Chindwin Fighter Group ၊ Chindwin Defense Force (CDF) ၊ Salingyi Revolution Army – SRA နှင့် Fight For Freedom (F3) တို့ ပူးပေါင်းကာ တိုက်ခိုက်ခဲ့ခြင်းဖြစ်ပြီး ပြည်သူ့ကာကွယ်ရေးတပ်ဖွဲ့ဝင်များ အထိအခိုက်မရှိ ပြန်လည် ဆုတ်ခွာနိုင်ခဲ့ကြောင်း သိရသည်။
D Day News
