သပိတ်ကျင်းမြို့နယ်၊ ကြက်ရိုးပင်ကျေးရွာဘုန်းကြီးကျောင်းကို စစ်တပ်က လေကြောင်းဖြင့် ဗုံးကျဲ တိုက်ခိုက်မှု ဘုန်းကြီး တစ်ပါး ပျံလွန်တော်မူပြီး ပြည်သူ ၄ ဦး ဒဏ်ရာရ
သံလွင်မြန်မာသတင်း
ဇွန်လ ၆
မန္တလေးတိုင်း၊ ပြင်ဦးလွင်ခရိုင်၊ သပိတ်ကျင်းမြို့နယ်၊ ကြက်ရိုးပင်ကျေးရွာဘုန်းကြီးကျောင်းကို စစ် တပ်က လေကြောင်းဖြင့် ဗုံးကျဲတိုက်ခိုက်ခဲ့ရာ ဘုန်းကြီးတစ်ပါး ပျံလွန်တော်မူပြီး ပြည်သူ ၄ ဦး ထိခိုက်ဒဏ်ရာရရှိခဲ့ကြောင်း ပြင်ဦးလွင်ခရိုင် ပြည်သူ့ကာကွယ်ရေးအဖွဲ့ -ပကဖ ထံမှ သိရသည်။
ယမန်နေ့ ဇွန်လ ၅ ရက် ညနေ ၅ နာရီ ၁၇ မိနစ်က တိုက်ပွဲဖြစ်ပွားခြင်းမရှိပဲ သပိတ်ကျင်းမြို့နယ်၊ ကြက်ရိုးပင်ကျေးရွာ ဘုန်းကြီးကျောင်းကို အကြမ်းဖက်စစ်ကောင်စီ၏ တံတားဦးလေတပ်မှ တက် လာသော ဂျက်ဖိုက်တာတစ်စီးဖြင့် ဗုံးကျဲတိုက်ခိုက်ခဲ့ရာ သက် ၆၇ နှစ်အရွယ်ရှိ ဘုန်းကြီးတစ်ပါး ပျံလွန်တော်မူပြီး ပြည်သူ အမျိုးသား ၃ ဦး၊ အမျိုးသမီး ၁ ဦး ထိခိုက်ရာရရှိခဲ့ကြောင်း သိရသည်။
“ပျံလွန်တော်မူတဲ့ဆရာတော်က သက်တော်က ၆၇ နှစ်၊ ဝါတော်ကတော့ မသိရဘူး။ ဆရာတော် အရိယဗျ။ သိမ်ကျောင်းဆောင် တစ်ဆောင် ပျက်စီးသွားတယ်၊ ဗုံးကတော့ တစ်လုံးကျဲသွားတာ၊ ပေါင်ဘယ်လောက်ဗုံးလဲတော့ ခန်းမှန်းလို့ မရဘူး” ဟု ပြင်ဦးလွင်ခရိုင် ပြည်သူ့ကာကွယ်ရေးအဖွဲ့ -ပကဖ မှ တာဝန်ရှိသူတစ်ဦးက ပြောကြားသည်။
အကြမ်းဖက်စစ်ကောင်စီသည် ဇွန်လ ၁ ရက်နေ့မှ ၃၀ ရက်နေ့အထိ တဖက်သတ်အပစ်အခတ်ရပ်စဲ ကြေညာထားသော်လည်း ယင်းကြေညာချက်ကို ချိုးဖောက်ကာ တိုက်ပွဲဖြစ်ပွားခြင်းမရှိပဲ အရပ်သား ပြည်သူများနေထိုင်ရာ ကျေးရွာများ၊ ဘုန်းကြီးကျောင်းများ၊ စာသင်ကျောင်းများကို ပစ်မှတ်၍ လေ ကြောင်းဖြင့် ဗုံးကျဲတိုက်ခိုက်နေခြင်းဖြစ်ပြီး မိဘပြည်သူများအနေဖြင့် စစ်ကောင်စီနှင့် ဝေးရာတွင် နေထိုင်ကြရန်နှင့် လေကြောင်းရန်ကာကွယ်နိုင်ရန်အတွက် ပုန်းခိုကျင်းများ တူးထားကြရန် နှိုးဆော် ထားသည်။
Thanlwin Myanmar Media
