ရေစကြိုမြို့အခြေစိုက် ခလရ ၂၅၆ တပ်ရင်းအတွင်းမှ ပြည်သူလူထုကို ပစ်မှတ်ထားတိုက်ခိုက်သည့် ဟောင်ဝှစ်ဇာလက်နက်ကြီး ပြောင်းကွဲကာ စစ်သား ၄ ဦးသေဆုံး၊ စစ်တပ်ကပစ်ခတ်သည့် လက်နက် ကြီးကြောင့် ပြည်သူ ၂ ဦးလည်း ထိခိုက်ဒဏ်ရာရ
သံလွင်မြန်မာသတင်း
ဇူလိုင်လ ၂၇
မကွေးတိုင်း၊ ရေစကြိုမြို့အခြေစိုက် ခလရ ၂၅၆ တပ်ရင်းအတွင်းမှ ပြည်သူလူထုကို ပစ်မှတ်ထား တိုက်ခိုက်သည့် ဟောင်ဝှစ်ဇာလက်နက်ကြီး ပြောင်းကွဲကာ စစ်သား ၄ ဦးသေဆုံးခဲ့ကြောင်း ရေစကြို မြို့နယ် ပြည်သူ့ကာကွယ်ရေးအဖွဲ့ – ရေစကြို ပကဖထံမှ သိရသည်။
ယမန်နေ့ ဇူလိုင်လ ၂၆ ရက် ညနေ ၃ နာရီ ၃၀ မိနစ်ခန့်က ရေစကြိုမြို့အခြေစိုက် ခလရ ၂၅၆ တပ်ရင်းအတွင်း မှ ဟောင်ဝှစ်ဇာ လက်နက်ကြီးဖြင့် ပြည်သူလူထုနေထိုင်ရာ ပိတောက်ပုံကျေးရွာ အတွင်းသို့ ၄ လုံး ပစ်ခတ်ခဲ့ကြောင်း၊ ထိုသို့ ပစ်ခတ်သည့် လက်နက်ကြီး ၄ လုံးအနက် ၂ လုံးမှာ ကျေးရွာအတွင်း ကျ ရောက်ပေါက်ကွဲပြီး ပြည်သူ ၂ ဦး ထိခိုက်ဒဏ်ရာရရှိကာ တစ်ဦးမှာ အပြင်း အထန်ဒဏ်ရာရရှိပြီး စိုးရိမ်ရကြောင်း၊ ထို့အပြင် နွားနှစ်ကောင်လည်း သေဆုံးကာ ပြည်သူ့နေအိမ် များလည်း ထိခိုက်ပျက်စီးခဲ့ကြောင်း သိရသည်။
ထိုသို့ ပြည်သူလူထုနေထိုင်ရာ ကျေးရွာအတွင်းသို့ ပစ်မှတ်ထားကာ တိုက်ခိုက်နေသည့် အဆိုပါ လက်နက်ကြီးသည် ပြောင်းထိပ်ကွဲသွားပြီး ပစ်ခတ်တိုက်ခိုက်သည့် စစ်သား ၄ ဦးလည်း ထိခိုက် သေဆုံးခဲ့ကြောင်း သိရသည်။
“မနေ့က ညနေ ၃ နာရီခွဲလောက် အားလုံးပေါင်း ၄ လုံးပစ်တာ၊ ၂ လုံးက ရွာထဲတည့်တည့်ကျတာ၊ ၂ ဦး ထိခိုက်ဒဏ်ရာရတယ်၊ အဲဒီထဲမှာ တစ်ဦးကတော့ ဒဏ်ရာပြင်းထန်တယ်၊ အသက်အန္တရာယ် စိုးရိမ် ရတယ်လို့ သိရတယ်၊ နေအိမ် ပျက်စီးတာတွေလည်း ရှိမယ်၊ မီးလောင်တဲ့အနေအထားမဟုတ်ပေ မယ့် ပျက်စီးတာတွေတော့ရှိတယ်။ မနေ့က ပစ်ခတ်ရင်း နောက်ဆုံး အလုံးမှာ ပြောင်းကွဲပြီး စခ ၄ လောက် သေတယ်၊ ပစ်ခတ်ရင်း ဟောင်ဝှစ်ဇာပြောင်းထိပ်ကွဲတာ၊ မီးခိုးလုံးတွေလည်းမြင်ရတယ်၊ တိုက်ပွဲမရှိပဲနဲ့ ရမ်းပစ်နေတာ၊” ဟု ရေစကြို မြို့နယ် ပြည်သူ့ကာကွယ်ရေးအဖွဲ့ – ရေစကြို ပကဖမှ တာဝန်ရှိသူတစ်ဦးက ပြောကြားသည်။
အကြမ်းဖက်စစ်ကောင်စီတပ်က မိဘပြည်သူလူထုကို ပစ်မှတ်ထားကာ လေကြောင်း၊ လက်နက်ကြီး များဖြင့် အချိန်မရွေး ပစ်ခတ်တိုက်ခိုက်လျက်ရှိသောကြောင့် အိမ်တိုင်း၊အိမ်တိုင်း ဗုံးခိုကျင်းများ ခိုင်ခိုင်မာမာ တူးထားကြရန်နှင့်လေကြောင်းရန်ကာကွယ်ရေးဆိုင်ရာ နည်းလမ်းများကိုလည်း လိုက်နာကျင့်သုံးကြပါရန် တော်လှန်ရေးအဖွဲ့အစည်းများက တိုက်တွန်းထားသည်။
Thanlwin Myanmar Media
