စစ်သင်္ဘောများဖြင့်ချပေးသည့် ခဲယမ်း၊ ရိက္ခာသယ်ယာဉ်တန်းကို မိုင်းဆွဲတိုက်ခိုက်မှု ကားတစ်စီး ပျက်စီး
သံလွင်မြန်မာသတင်း
ဇူလိုင်လ ၈
မကွေးတိုင်း၊ ရေစကြိုမြို့နယ်တွင် စစ်သင်္ဘောများပေါ်မှချပေးသည့် ရိက္ခာပို့ယာဉ်တန်းကို မိုင်းဆွဲ တိုက်ခိုက်ခဲ့ရာ ကားတစ်စီးပျက်စီးခဲ့ကြောင်း ရေစကြိုပကဖ ထံမှ သိရသည်။
ယမန်နေ့ ဇူလိုင်လ ၇ ရက်နံနက်ပိုင်းက ချင်းတွင်းမြစ်ကြောင်းအတိုင်း ဆန်တက်လာသော စစ် ကောင်စီ သင်္ဘော အစီး ၂၀ ကျော်ပေါ်ပါ ခဲယမ်း၊ ရိက္ခာအချို့ကို ရေစကြိုမြို့ တပ်ရင်း ၃ ခုအတွက် ရေစကြိုငြိမ်းဇာနည် စစ်မှုထမ်းဟောင်းရုံးအနီးချပေးထားခဲ့ကြောင်း သိရသည်။
ထိုသို့ချပေးပြီးနောက် ပြည်သူပိုင်ကား ၁၀ စီးကိုချောဆွဲကာ ညနေ ၆ နာရီခန့်တွင် လက်နက်ခဲယမ်း ရိက္ခာများကို တင်ဆောင်၍ ငြိမ်းဇာနည်စစ်မှုထမ်းဟောင်းရုံးအနီးမှ ခလရ ၂၅၆ ၊ ၂၅၇ ၊ ၂၅၈ တပ် ရင်းသို့ ပို့ဆောင်ရန်ထွက်ခွာလာစဉ် ရေစကြိုမြို့အထွက်အရောက် ပြည်သူ့ကာကွယ်ရေးတပ်ဖွဲ့ ဝင် များက ပဒေသာမိုင်း ၅ လုံးဖြင့် မိုင်းဆွဲတိုက်ခိုက်ခဲ့ကြောင်း သိရသည်။
“ချင်းတွင်းမြစ်အတိုင်း အောက်ကနေ အထက်ကို ဆန်တက်လာတာ၊ စစ်သင်္ဘောအစီး ၂၀ ကျော် လောက်ရှိတယ်၊ အဲဒီသင်္ဘောတွေက မုံရွာသွားမယ့်သင်္ဘောတွေ၊ အဲဒီကနေ လမ်းကြုံဝင်ထားခဲ့ တာပေါ့၊ ရေစကြို ခလရ ၂၅၆ ၊ ၂၅၇ ၊ ၂၅၈ အတွက်ခဲယမ်းတွေကို ငြိမ်းဇာနည်မှာချခဲ့တာ၊ ချထားခဲ့ တဲ့ပစ္စည်းတွေကို သယ်ဖို့ ပြည်သူတွေကားတွေကိုချောဆွဲပြီးတော့ တပ်ရင်းတွေထဲကိုပို့တဲ့လမ်း မြို့ အထွက်မှာ မိုင်းဆွဲခဲ့တာ၊ ပြည်သူတွေကားတွေက ကုန်တင်လို့ရတဲ့ကားတွေ၊ လိုက်ပ်ထရပ်၊ ထော် လာဂျီ၊ ပုဇင်းခေါင်းလိုကားတွေကို ချောဆွဲလာတာ၊ တစ်စီးတော့ပျက်စီးတယ်၊ နောက်ဆက်တွဲ ထိခိုက်သေဆုံးမှုတော့ မသိရသေးဘူး။ စုံစမ်းနေတုန်းပဲ၊” ရေစကြိုပကဖမှ တာဝန်ရှိသူတစ်ဦးက ပြောကြားသည်။
အဆိုပါ မိုင်းဆွဲတိုက်ခိုက်မှုကို ရေကြိုမြို့နယ်ပြည်သူ့ကာကွယ်ရေးအဖွဲ့ – ပကဖမှ ရဲဘော်များက ကင်းပုန်းအထပ်ထပ်ကြားက မိုင်းဆွဲတိုက်ခိုက်ခဲ့ခြင်းဖြစ်ပြီး ကားတစ်စီး ပျက်စီးကာ စစ်ကောင်စီ တပ်သား သေဆုံး ထိခိုက်မှု အသေးစိတ်သိရှိနိုင်ရန် စုံစမ်းနေဆဲဖြစ်ကြောင်း၊ တိုက်ခိုက်ခံရပြီး စစ်ကောင်စီယာဉ်တန်း မှာ တပ်ထဲသို့ဝင်ရောက်သွားကြောင်း သိရသည်။
ပြည်သူပိုင်ကားများကိုချောဆွဲခဲ့သော်လည်း ကားမောင်းသမားပြည်သူများကို ငြိမ်းဇာနည်စစ်မှုထမ်း ဟောင်းရုံးအနီးထားရှိခဲ့ပြီး စစ်ကောင်စီတပ်သားများက ယင်းယာဉ်များကို မောင်းနှင်သွားခြင်းဖြစ် ကြောင်း သိရသည်။
Thanlwin Myanmar Media
