ဂန့်ဂေါမြို့နယ်နှင့်ကျောက်ထုဒေသတွင် စစ်တပ်က လေကြောင်း၊ လက်နက်ကြီးဖြင့် ဗုံးကျဲပစ်ခတ် တိုက်ခိုက်
သံလွင်မြန်မာသတင်း
မေလ ၂၁
မကွေးတိုင်း၊ ဂန့်ဂေါမြို့နယ် မြောက်ပိုင်း ၊ ချောင်းခွကျေးရွာအနီးကို အကြမ်းဖက်စစ်ကောင်စီတပ်က လေကြောင်းဖြင့် ၂ ကြိမ် ဗုံးကျဲတိုက်ခိုက်ခဲ့ကြောင်း ယောအလင်းတန်းထံမှ သိရသည်။
ယမန်နေ့မေလ ၂၀ ရက် နံနက် ၉ နာရီ ၁၈ မိနစ်မှ ၂၂ မိနစ်အထိ ဂန့်ဂေါမြို့နယ် မြောက်ပိုင်း၊ ချောင်းခွ ကျေးရွာအနီးကို အကြမ်းဖက်စစ်ကောင်စီ၏ တံတားဦးလေတပ်မှ တက်လာသော ဂျက်ဖိုက်တာ တစ်စီးဖြင့် ၂ ကြိမ် ပျံဝဲပြီး ဗုံးသီး ၂ လုံးကျဲချတိုက်ခိုက်ခဲ့ကြောင်း၊ ထိုသို့ ဗုံးကျဲတိုက်ခိုက်မှုကြောင့် ထိခိုက်မှုမရှိကြောင်း သိရသည်။
“ချောင်းခွကျေးရွာနားကို ကျဲသွားတာ၊ ကျဲသွားတာက ၂ လုံးပဲ၊ ချောင်းခွရွာ အနောက်မြောက်ဖက် တော်ဝင်ချောင်းဘေး၊ တောင်ဘက်တစ်လုံး၊ မြောက်ဘက်တစ်လုံး ချသွားတာ၊ အထိအခိုက်တော့ မရှိပါဘူး” ဟု ယောအလင်းတန်းမှ ကိုဘကောင်းက ပြောကြားသည်။
အလားတူ မေလ ၁၉ ရက် မွန်းလွဲ ၂ နာရီ ၅ မိနစ်ကလည်း ကျောက်ထုမြို့ အမြာက်တပ်က ကျောက် ထုကွင်း အနောက်ဘက်ရှိ အညာ ၅ ရွာဖြစ်သည့် ရဲရင့်ရွာ၊ ကံကြီးရွာ ၊ ပြင်လယ်ရွာ ၊ တောင့်ထက်ရွာနှင့် ရေရှင် ကျေးရွာတို့ဘက်ကို လက်နက်ကြီး၊ ဒရုန်းများဖြင့် ဗုံးကျဲပစ်ခတ်တိုက် ခိုက်နေ ခြင်းဖြစ်ပြီး ပြည်သူထိခိုက်သေဆုံးမှုနှင့်နေအိမ်ပျက်စီးမှုအခြေအနေကို သိရှိရခြင်းမရှိသေး ကြောင်း သိရသည်။
“ကျောက်ထုကွင်းအနောက်ဘက်မှာရှိတဲ့ ရွာ ၅ ရွာကို အညာ ၅ ရွာလို့ခေါ်တာပါ၊ ဒရုန်းနဲ့ချတာ ၂ ချက်၊ လက်နက်ကြီးနဲ့က ၆ ချက်လောက်ရှိသွားပြီ။ လက်တလောဖြစ်နေတုန်းမို့ ထိခိုက်မှု အခြေအ နေကတော့ မသိရသေးဘူး။ စစ်တပ် စစ်ကြောင်း ကံကြီးရွာကို ရောက်နေတယ်လို့ သတင်းကြားရ ပေမယ့် အတည်ပြုလို့တော့ မရသေးပါဘူး” ဟု ယောအလင်းတန်းမှ ကိုအောင်ကြီးက ပြောကြား သည်။
အကြမ်းဖက်စစ်ကောင်စီတပ်က မေလ ၆ ရက်နေ့မှ ၃၁ ရက်နေ့အထိ အပစ်အခတ်ရပ်စဲသည်ဟု ကြေညာထားသော်လည်း အရပ်သားပြည်သူလူထုများနေထိုင်ရာ ကျေးရွာများ၊ ဆေးခန်း၊ စာသင် ကျောင်းများ၊ ဘာသာရေးအဆောက်အအုံများ၊ စစ်ဘေးရှောင်စခန်းများကို လေကြောင်း၊ လက်နက် ကြီး၊ ဒရုန်းများဖြင့် ဗုံးကျဲပစ်ခတ်တိုက်ခိုက်နေကြောင်း သိရသည်။
Thanlwin Myanmar Media
