ရေစကြိုမြို့နယ်၊ မင်းရွာ ပျူစခန်းကို ဝင်ရောက်တိုက်ခိုက်မှု စစ်သားများ ထိခိုက်သေဆုံးမှုရှိပြီး စစ်တပ် ဟောင်ဝှစ်ဇာ၊ တိုက်လေယာဉ်များဖြင့် ပစ်ကူပေးခဲ့
သံလွင်မြန်မာသတင်း
ဒီဇင်ဘာလ ၁၂
မကွေးတိုင်း၊ ရေစကြိုမြို့နယ်၊ ရေလယ်ကျွန်းဒေသ၊ မင်းရွာ ပျူစခန်းအား ဝင်ရောက်တိုက်ခိုက်ခဲ့ရာ စစ်သား၊ ပျူများထိခိုက်သေဆုံးမှုရှိပြီး စစ်တပ်က ဟောင်ဝှစ်ဇာ၊ တိုက်လေယာဉ်တွေနဲ့ပစ်ကူပေး တိုက်ခိုက်ခဲ့တယ်လို့ ရွှေဂျိုးဖြူပြည်သူ့ကာကွယ်ရေးတပ်ဖွဲ့ထံက သိရပါတယ်။
ဒီဇင်ဘာလ ၇ ရက် မနက် ၄ နာရီက ရေစကြိုမြို့နယ်၊ ရေလယ်ကျွန်းဒေသအတွင်းရှိ စစ်ကောင်စီ တပ် အထိုင်ချ တပ်စွဲထားတဲ့ မင်းရွာပျူရွာကို ဒေသခံကာကွယ်ရေးအဖွဲ့တွေနဲ့ ခရိုင်တပ်ရင်းတွေ ပူးပေါင်းကာ မြေပြင်စစ်ကြောင်း ၃ ကြောင်း၊ Drone တွေနဲ့ စခန်း သိမ်းတိုက်ပွဲအဖြစ် ဆင်နွှဲခဲ့တာပါ။
အဲဒီတိုက်ပွဲဟာ အပြန်အလှန်ပစ်ခတ်တိုက်ပွဲ ၄ နာရီကျော်ကြာမြင့်ခဲ့ကာ ရေစကြိုမြို့ စစ်ကောင်စီ အထိုင်တပ်စခန်းကနေ ဟောင်ဝှစ်ဇာလက်နက်ကြီးနဲ့ အကြိမ်ပေါင်းများစွာ ပစ်ကူပေးသလို တံတား ဦးကနေ တက်လာတဲ့ တိုက်လေယာဉ်တစ်စီးနဲ့လည်း ၄ ကြိမ်တိတိ ဗုံးကြဲပစ်ခတ်တိုက်ခိုက်ခဲ့တယ် လို့ သိရပါတယ်။
တိုက်ပွဲချိန် ကြာမြင့်လာလာလို့ လက်နက်ခဲယမ်းကျည်လျော့နည်းလာသလို စစ်ကောင်စီတပ်ရဲ့ မြေ ပြင်၊ ဝေဟင်ပစ်ကူပေး တိုက်ခိုက်မှုတွေ ပြင်းထန်လာတာကြောင့် ပြည်သူ့ကာကွယ်ရေးတပ်ဖွဲ့ဝင် တွေ ပြန်လည် ဆုတ်ခွာခဲ့ရတယ်လို့ ရွှေဂျိုးဖြူပြည်သူ့ကာကွယ်ရေးတပ်ဖွဲ့က ပြောပါတယ်။
တိုက်ပွဲအတွင်းမှာ အကြမ်းဖက်စစ်ကောင်စီတပ်က ရွာခြံစည်းရိုးမှာ ထောင်ထားတဲ့ နင်းမိုင်းမိကာ ရဲဘော်တစ်ဦး ခြေထောက်နှစ်ဖက် ဆုံးရှုံးခဲ့ရပါတယ်။
အဲဒီစစ်ဆင်ရေးကို ရွှေဂျိုးဖြူ-ပြည်သူ့ကာကွယ်ရေးတပ်ဖွဲ့ ၊ MGN (Mandalay Regional Battalion) ၊ မြင်းမူမြို့ပြတော်လှန်ရေးအဖွဲ့ (M.C.R.F) ၊ MGN Tiger – မြင်းခြံခရိုင်တပ်ရင်း ၂ ၊ တပ်ခွဲ ၂ ၊ MGN Ranger – မြင်းခြံခရိုင်တပ်ရင်း ၂ ၊ တပ်ခွဲ ၃ ၊ မြင်းခြံခရိုင်တပ်ရင်း ၃ ၊ Myingyan 35၊ ဒေါင်းညီနောင် ၊ Wolf Brothers PDF ၊ နွေဦးစစ်သည် ၊ မြင်းခြံခရိုင် Drone Team ၊ YLK ပျောက်ကြားတပ်ဖွဲ့ နဲ့ MY PDF တပ်ဖွဲ့တွေပူးပေါင်းတိုက်ခိုက်ခဲ့တာဖြစ်ပါတယ်။
Thanlwin Myanmar Media
