စစ်ရေးသတင်းအချက်အလက်များကို တိုက်ခိုက်ရေးအဖွဲ့များက မထုတ်ပြန်မချင်း ဆိုရှယ်မီဒီယာ ပေါ် မတင်ကြရန် KNLA တပ်မဟာ (၄) ၊ အထူးတပ်ဖွဲ့က မေတ္တာရပ်ခံ
သံလွင်မြန်မာသတင်း
ဇူလိုင်လ ၂၈
စစ်ရေးသတင်းအချက်အလက်များကို တိုက်ခိုက်ရေးအဖွဲ့များက မထုတ်ပြန်မချင်း ဆိုရှယ်မီဒီယာ ပေါ် မတင်ကြရန် KNLA တပ်မဟာ ၄ ၊ အထူးတပ်ဖွဲ့က ထုတ်ပြန်သည်။
ယခုခေတ်သည် နည်းပညာခေတ် ဖြစ်သည့် အားလျော်စွာ တနေရာတွင် ဖြစ်နေသည့် သတင်းများကို တခြား တနေရာမှ လွယ်ကူ လျင်မြန်စွာ သိရှိနိုင်သော အခြေအနေတွင် ရှိကြောင်း အသိပေးထား သည်။
သတင်းအချက်အလက် ဟူသည် သုံးတတ်ပါက တိုက်ခိုက်ရေးအတွက် အရေးပါသော အစိတ်အပိုင်း တခု ဖြစ်သည့်အတွက် မည်သည့် သတင်းကို မည်အချိန်တွင် မည်မျှလောက် မိမိရန်သူကို ပေးသိ ထားမည် ဆိုသည်မှာလည်း တိုက်ခိုက်ရေး၏ ဗျူဟာ တခု ဖြစ်ကြောင်း ဆက်လက် ပြောဆိုထား သည်။
သို့ဖြစ်ပါ၍ စစ်မြေပြင်၊ စစ်ရေးနှင့် ပတ်သက်သော အချက်အလက်များ၊ သတင်းများ၊ ဓာတ်ပုံများကို Facebook, Instagram, TikTok စသည့် Social Media များတွင် သက်ဆိုင်ရာ တိုက်ခိုက်ရေး အဖွဲ့ များ၏ ပြန်ကြားရေးဌာန သတင်းပေ့များမှ တင်ပြီးမှ တင်ကြပါရန် မေတ္တာ ရပ်ခံထားသည်။
သာမန် အရေးမကြီးသော သတင်းအချက်အလက်များ၊ ဓာတ်ပုံများသည် စစ်ရေးအတွက် နစ်နာမှု မရှိ နိုင်သော်လည်း၊ တချို့ သတင်းများကို စစ်ကောင်စီမှ သိသွားပါက တော်လှန်ရေးအတွက် အနှောက် အယှက် ဖြစ်နိုင်သလို ဓာတ်ပုံများတွင် ပါဝင်နေသော မိသားစုဝင်များအတွက်ပါ ထိခိုက်နစ်နာမှုများ ရှိလာနိုင်သောကြောင့် ပြည်သူများ၏ လုံခြုံရေးကို ရှေးရှု၍ ပန်ကြားရခြင်း ဖြစ်ကြောင်း ထုတ်ပြန် ချက်တွင် ဖော်ပြထားသည်။
Thanlwin Myanmar Media
