ပေါင်းတည်အကျဉ်းထောင်တွင် နိုင်ငံရေးအကျဉ်းသားတစ်ဦး ရုတ်တရက်သေဆုံး
သံလွင်မြန်မာသတင်း
ဇူလိုင်လ ၈
ပဲခူးတိုင်၊ ပေါင်းတည်အကျဉ်းထောင်တွင် နိုင်ငံရေးအကျဉ်းသားတစ်ဦး နှလုံးရပ်ကာ ရုတ်တရက် သေဆုံးသွားကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) က ထုတ် ပြန်သည်။
ဇူလိုင်လ ၅ ရက်နေ့က ပေါင်းတည် အကျဥ်းထောင်တွင် ပုဒ်မ ၅၀ (ည)ဖြင့် ထောင်ဒဏ် ၁၀ နှစ် ကျခံ နေရသူ နိုင်ငံရေးအကျဉ်းသား အသက် ၄၅ နှစ်အရွယ် ကိုလှမင်း (ခ) ကိုလှကြီး သည် သတိလစ် မေ့မျောသွားသဖြင့် ပေါင်းတည်ပြည် သူ့ ဆေးရုံသို့ ပို့ဆောင်ခဲ့သော်လည်း သေဆုံးခဲ့ခြင်းဖြစ်ကြောင်း သိရသည်။
သေဆုံးသူ ကိုလှမင်း (ခ) ကိုလှကြီးသည် ယခင်ကတည်းက ရောဂါအခံမရှိဘဲကျန်းမာသူဖြစ်ကာ ရုတ်တရက် နှလုံးရပ်သွားခဲ့ခြင်းကြောင့် သေဆုံးခဲ့ခြင်းဖြစ်ကြောင်း၊ ၎င်းသေဆုံးခဲ့မှုအပေါ် အခြား အကြောင်းအရင်းများ ရှိ၊ မရှိကို ဆက်လက်စုံစမ်းနေဆဲဖြစ်ကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) က ပြောဆိုထားသည်။
ပေါင်းတည်အကျဉ်းထောင်တွင် အခြားအကျဉ်းထောင်များနည်းတူ ဆေးဝါးမလုံလောက်မှုနှင့် ကျန်း မာရေးစောင့်ရှောက်မှု လိုအပ်ချက်များ ရှိနေဆဲဖြစ်သည်ဟု ဆိုသည်။
၂၀၂၅ခုနှစ် ဇန်နဝါရီလမှ ဇူလိုင်လ ၈ ရက်နေ့အထိ မြန်မာနိုင်ငံရှိ အကျဥ်းထောင်များအတွင်း ကျန်း မာရေးကြောင့် သေဆုံးခဲ့ရသည့် နိုင်ငံရေးအကျဉ်းသား စုစုပေါင်း ၁၄ ဦးအထိ ရှိကြောင်း မြန်မာနိုင်ငံ လုံးဆိုင်ရာ နိုင်ငံရေးအကျဉ်းသားများကွန်ရက် (PPNM) ထုတ်ပြန်ထားသည်။
စစ်ကောင်စီ၏ လက်အောက်ခံ သက်ဆိုင်ရာ ထောင်အာဏာပိုင်များအနေဖြင့် မတရားဖမ်းဆီးခံ ထားရသည့် နိုင်ငံရေးအကျဉ်းသားများအပေါ် လိုအပ်သည့် ကျန်းမာ ရေးစောင့်ရှောက်မှု အပြည့်အဝ ပေးခြင်းမရှိဘဲ လူ့အခွင့်အရေးချိုးဖောက်မှုများ ကျူးလွန်မှုများကို အမြန်ဆုံး ရပ်တန့်ရန် ဆက်လက် တောင်းဆိုထားသည်။
Thanlwin Myanmar Media
