ဖျာပုံအကျဉ်းထောင်အတွင်း၌ ပစ်ခတ်မှုဖြစ်ပြီး အကျဉ်းသား ၁၇ ဦး ထိခိုက်ဒဏ်ရာရ
D Day News
ဧပြီလ ၁
ဧရာဝတီတိုင်း၊ ဖျာပုံမြို့အကျဉ်းထောင်အတွင်း၌ ပစ်ခတ်မှုဖြစ်ပြီး နိုင်ငံရေးအကျဉ်းသား ၁၇ ဦး ထိခိုက်ဒဏ်ရာရရှိထားကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက်- PPNM က ထုတ်ပြန်ထားသည်။
ယမန်နေ့ မတ်လ ၃၁ ရက် ညနေ ၅ နာရီခန့်က ဖျာပုံအကျဉ်းထောင်အတွင်း၌ ပစ်ခတ်သံများကြားရ ပြီး အကျဉ်းထောင်အတွင်းသို့ စစ်ကားများဝင်ရောက်သွားကြောင်း၊ ပစ်ခတ်ဖြိုခွင်းမှုအတွင်း နိုင်ငံရေး အကျဉ်းသားများအပါအဝင် အခြားအကျဉ်းသား ၁၇ ဦး ထိခိုက်ဒဏ်ရာရရှိထားကြောင်း သိရသည်။
ယနေ့ ဧပြီလ ၁ ရက်နေ့တွင် ဖျာပုံအကျဉ်းထောင်အတွင်းသို့ ပေးပို့သည့် ပါဆယ်များ လက်ခံခြင်းမရှိ ပဲ ပိတ်ပင်ထားပြီး စစ်သား၊ ရဲတပ်ဖွဲ့ဝင်များမှာလည်း အကျဉ်းထောင်အတွင်း၌ ရှိနေဆဲဖြစ်ကြောင်း သိရသည်။
လက်ရှိအချိန်တွင် နိုင်ငံရေးအကျဉ်းသားများကို ခေါ်ယူစစ်ဆေးနေဆဲဖြစ်ပြီး ထပ်မံသိရှိရသည့် နောက်ဆုံးအခြေအနေများကို အသိပေးထုတ်ပြန်သွားမည်ဖြစ်ကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် – PPNM က ပြောဆိုထားသည်။
