သံလွင်မြန်မာသတင်း
စက်တင်ဘာလ ၃၀
မကွေးတိုင်း၊ မင်းဘူးခရိုင်၊ စလင်းမြို့နယ်တွင် စစ်မှုထမ်းတပ်သား ၁ ဦး လက်နက်ခဲယမ်းများ ယူ ဆောင်ပြီး အလင်းဝင်ခဲ့ကြောင်း မင်းဘူးခရိုင် အမှတ် ၅ တပ်ရင်းက ထုတ်ပြန်သည်။
စက်တင်ဘာလ ၂၀ ရက်နေ့က စလင်းမြို့နယ်၊ ဆင်ဖြူကျွန်းမြို့ ၊ နွယ်တမယ် တံတားဂိတ်၌ တာဝန် ကျနေသော ခ.လ.ရ ၂၅၄ မှ စစ်မှုထမ်း တသ ထက်မြတ်ထွန်းသည် MA-၂ အမျိုးအစား သေနတ် ၁ လက်၊ ကျည်ဘောက် ၃ ခု၊ ဘောက်ဝိုင်း ၁ ခု ၊လက်ပစ်ဗုံး ၁ လုံး ၊ ၅.၅၆ ကျည် ၁၄၅ တောင့် ယူ ဆောင်ကာ မင်းဘူးခရိုင် အမှတ် ၅ တပ်ရင်းထံ အလင်းဝင်ခဲ့ကြောင်း သိရသည်။
အလင်းဝင်ရောက်ခဲ့သူ စစ်မှုထမ်း တသ ထက်မြတ်ထွန်းမှာ ယခင်က PDF တပ်ဖွဲ့ ထောက်ပို့ရဲဘော် ဟောင်း တစ်ဦး ဖြစ်ပြီး ထောက်ပို့လုပ်ငန်းလုပ်ဆောင်စဥ် ၂၀၂၃ ခုနှစ် ဇူလိုင်လပိုင်းတွင် လမ်းပေါ်၌ ပေါ်တာဆွဲခံရကာ ပြင်ဦးလွင် – မန္တလေးကြား မန္တလေးစုဆောင်းရေးတပ် ၉၁၀ သို့ ပို့ဆောင်ခံလိုက် ရကြောင်း၊ ယင်းတပ်တွင် ၃ လခန့်အကြာ ထိန်းသိမ်းခံထားခဲ့ရကြောင်း သိရသည်။
ထို့နောက် တောင်ကြီးမြို့နယ်၊ ဟိုပုံးမြို့သို့ ပို့ဆောင်ခံလိုက်ရပြီး စစ်မှုထမ်း အပတ်စဉ် ၁/၂၀၂၄ သင် တန်းသို့ တက်ရောက်ခဲ့ရကာ သင်တန်းဆင်းပြီးနောက် ပခုက္ကူမြို့အခြေစိုက်တပ်မ ၁၀၁ သို့ ပို့ဆောင် ခံလိုက်ရကြောင်း၊ ယင်းမှ တဆင့် ခလရ – ၂၅၄ တပ်ရင်းသို့ ထပ်မံပို့ဆောင်ခံခဲ့ရသူဖြစ်ကြောင်း သိရ သည်။
လက်နက်ခဲယမ်းများနှင့်အတူ အလင်းဝင်လာသည့် တပ်သား ထက်မြတ်ထွန်းအား မင်းဘူး ခရိုင်၊ အမှတ် ၅ တပ်ရင်းမှ ဂုဏ်ပြု ဆုငွေ ကျပ်သိန်း ၁၀၀ တိတိကို ချီးမြှင့်ပေးအပ်ခဲ့ပြီး ၎င်းဖြစ်ချင်သည့် ဆန္ဒအတိုင်း ဆက်လက်လုပ်ဆောင်ပေးသွားမည် ဖြစ်ကြောင်း အသိပေးထားသည်။
ယခုကဲ့သို့ အကြမ်းဖက်စစ်တပ်၏ လက်အောက်မှ ရုန်းထွက်ကာ တော်လှန်ရေးတပ်ဖွဲ့များထံ ပူး ပေါင်း ပါဝင်ချင်သူများကို မင်းဘူးခရိုင်ရှိ တော်လှန်ရေးတပ်ဖွဲ့များမှ ဝမ်းမြောက်ဝမ်းသာစွာ ကြိုဆို လျက်ရှိကြောင်း အသိပေးထားသည်။
Thanlwin Myanmar Media
