သံလွင်မြန်မာသတင်း
ဩဂုတ်လ ၂၉
တနင်္သာရီတိုင်း၊ ရေဖြူမြို့နယ်၊ မရမ်းချောင်းကျေးရွာ ရှေ့တန်းစစ်မြေမှ စစ်မှုထမ်းတပ်သား ၄ ဦး ထွက်ပြေးလာပြီး အလင်းဝင်ခဲ့ကြောင်း နည်းဗျူဟာ ၃၃ က ထုတ်ပြန်သည်။
ဩဂုတ်လ ၁၉ ရက်နေ့မှစ၍ ရေဖြူမြို့နယ်၊ ကော့လှိုင်းကျေးရွာ၊ မရမ်းချောင်းကျေးရွာနှင့် မိုင် ၆၀ ကျေးရွာတို့ဘက်သို့ စစ်ကြောင်းထိုးလာသော အကြမ်းဖက်စစ်တပ်မှ စစ်မှုထမ်းတသ နန်းကိုကို (ခမရ ၄၀၉) ၊ တသ ဇေယျာဝင်း (ခ)ကျော်ဝင်း (ခမရ – ၄၀၅) ၊ တသ နိုင်လင်းအောင် (ခမရ ၄၀၉) နှင့် တသ ရန်နိုင်မင်း(ခ)ချစ်စမ်းမောင် (ခလရ၂၈၂) တို့သည် တိုက်ပွဲဖြစ်ပွားနေစဉ် ထွက်ပြေးလာပြီး တော်လှန် ရေးပူးပေါင်းတပ်ဖွဲ့ထံ အလင်းဝင်ခဲ့ခြင်းဖြစ်ကြောင်း သိရသည်။
ရှေ့တန်းစစ်မြေပြင်မှ ထွက်ပြေးလာပြီး အလင်းဝင်ခဲ့သည့် စစ်သားများကို အမျိုးသားညီညွတ်ရေး အစိုးရ မှချမှတ်ထားသည့် စစ်သုံ့ပန်းဥပဒေနှင့်အညီထိန်းသိမ်းဆောင်ရွက်ထားကြောင်း၊ ထိုသို့ ထွက် ပြေး လာသူများမှာ အကြမ်းဖက်စစ်ကောင်စီ၏ မတရားစစ်မှုထမ်းဥပဒေကြောင့် ပေါ်တာဆွဲဖမ်းဆီး ခြင်းခံရကာ စစ်သင်တန်း၂ လခွဲခန့်သာ သင်တန်းတက်ရောက်ခဲ့ပြီး စစ်မြေပြင်သို့ပို့ဆောင်ခံရသူများ ဖြစ်ကြောင်း သိရသည်။
အကြမ်းဖက်စစ်ကောင်စီ၏ အထက်အရာရှိများက မတရားခိုင်းစေခြင်း၊ စစ်မြေပြင်၌ ရှေ့ဆုံးမှထား ပြီး မတရားအမိန့်ပေးကာ တက်ခိုင်းခြင်း၊ ကျေးရွာအတွင်းရှိ ပြည်သူပိုင်နေအိမ်များအတွင်းမှ ပစ္စည်း များအား ဖောက်ယူ ခိုးယူခြင်း၊ အရပ်သားပြည်သူများအား ဖမ်းဆီး နှိပ်စက်သတ်ဖြတ်ခြင်း လုပ် ဆောင်လျက်ရှိကြောင်း အလင်းဝင်စစ်သားများက ဝန်ခံထွက်ဆိုထားကြောင်း သိရသည်။
ထို့အပြင် အကြမ်းဖက်စစ်ကောင်စီစစ်ကြောင်းက ရေဖြူမြို့နယ်အတွင်းရှိကော့လှိုင်းရွာ၊ မရမ်း ချောင်းရွာ၊ မိုင် ၆၀ ရွာ ၊ သာယာမွန်ကျေးရွာတို့အတွင်းသို့ လက်နက်ကြီးဖြင့် ပစ်ခတ်ခြင်းနှင့် ပြည်သူများကို မတရားဖမ်းဆီး သတ် ဖြတ်ခြင်းတို့လုပ်ဆောင်လျက်ရှိကြောင်း သိရသည်။
ထိုသို့လုပ်ဆောင်မှုများကို ခလရ ၂၈၂ ၊ ခမရ ၄၀၇ ၊ ခမရ ၄၀၈ ၊ ခမရ ၄၀၉ ၊ ခမရ ၄၁၀ ၊ ခလရ ၂၇၃ တို့မှ ကျူးလွန်ခဲ့ခြင်း ဖြစ်ပြီး ဗိုလ်မှူးစိုးမိုးကျော် ဒုတပ်ရင်းမှူး (ခမရ ၄၀၉) ၊ ဗိုလ်ကျော်မျိုးခိုင် ခမရ ၄၀၉ ၊ ဗိုလ်ကြီး ဝင်းမင်း စိုး၊ ဗိုလ်ကြီး အံ့ဘုန်းကျော်၊ ဗိုလ်ကြီး အာကာစိုး (ခလရ ၂၈၂) ၊ ဗိုလ်မှူးကျော်ဆန်းထွန်း (ခမရ ၄၀၇) တို့ ဦးဆောင်ကာ ကျူးလွန်ခဲ့ခြင်းဖြစ်ကြောင်း သိရသည်။
Thanlwin Myanmar Media
