ရန်ကုန် -မန္တလေးလမ်းဟောင်းပေါ်ရှိ တော်ဝိကျေးရွာ၌ တပ်စွဲထားသော စစ်တပ်စခန်းကို သိမ်းပိုက် ရရှိ၊ စစ်သား ၁၃ ဦးသေဆုံးပြီး ၃ ဦးအရှင်ဖမ်းမိကာ လက်နက်ခဲယမ်းများလည်း သိမ်းဆည်းရရှိ
သံလွင်မြန်မာသတင်း
ဇွန်လ ၂၅
ပဲခူးတိုင်း ၊ ညောင်လေးပင်မြို့နှင့် ကျောက်တံခါးမြို့ကြားရှိ တော်ဝိကျေးရွာ၌ တပ်စွဲထားသော စစ် တပ်စခန်းကို အပြီးသတ်သိမ်းပိုက်ခဲ့ရာ စစ်ကောင်စီတပ်သား ၁၃ ဦးသေဆုံးပြီး ၃ ဦးအရှင်ဖမ်းမိကာ လက်နက်ခဲယမ်းများလည်း သိမ်းဆည်းရရှိခဲ့ကြောင်း တော်ဝင်ဒေါင်းတပ်ရင်းထံမှ သိရသည်။
ယနေ့ ဇွန်လ ၂၅ ရက် နံနက်အစောပိုင်း ၁ နာရီခန့်က ညောင်လေးပင်မြို့နှင့်ကျောက်တံခါးမြို့ကြား၊ ရန်ကုန် -မန္တလေးလမ်းဟောင်းပေါ်ရှိ တော်ဝိကျေးရွာ၌ စစ်ကောင်စီတပ်သား အင်အား ၅၀ ခန့်ဖြင့် တပ်စွဲထားသော စစ်တပ်စခန်းကို တော်လှန်ရေးပူးပေါင်းတပ်ဖွဲ့မှ ဝင်ရောက်တိုက်ခိုက်ခဲ့ရာ နံနက် ၂ နာရီအချိန်တွင် အပြီးသတ်သိမ်းပိုက်ရရှိခဲ့ကြောင်း သိရသည်။
“လက်နက်ကြီးပစ်ကူကတော့ ထိတွေ့တိုက်ပွဲ စဖြစ်ကတည်းက တောက်လျှောက်ပစ်ပေးတာမျိုးရှိ ပါတယ်။ လေကြောင်းပစ်ကူတော့မလာပါဘူး ။ စခန်းကိုတော့ စစ်ဆင်ရေးရည်မှန်းချက်အတိုင်း အောင်မြင်စွာ တိုက်ခိုက် သိမ်းပိုက်နိုင်ခဲ့ပါတယ်” ဟု တော်ဝင်ဒေါင်းတပ်ရင်းမှ တာဝန်ရှိသူတစ်ဦးက ပြောကြားသည်။
ယင်းစခန်းသိမ်းတိုက်ပွဲအတွင်း စစ်ကောင်စီတပ်သား ၁၃ ဦးသေဆုံးပြီး ၃ ဦးအရှင်ဖမ်းမိကာ ကျန်ရှိ သော စစ်ကောင်စီတပ်သားများမှာ စခန်းစွန့်ခွာထွက်ပြေးသွားကြောင်း၊ ထို့ကြောင့် စစ်တပ်စခန်းအ တွင်းမှ လက်နက်ခဲယမ်း၊ စစ်အသုံးအဆောင်ပစ္စည်းများ သိမ်းဆည်းရရှိကာ တော်လှန်ရေး တပ်ဖွဲ့ ဝင်များ အထိအခိုက်မရှိ ပြန်လည် ဆုတ်ခွာနိုင်ခဲ့ကြောင်း သိရသည်။
အဆိုပါ တိုက်ခိုက်မှုကို ပြည်သူ့ကာကွယ်ရေး တပ်မတော် ဗျူဟာ၂၆ ၏ ကွပ်ကဲမှုဖြင့် တော်ဝင်ဒေါင်း တပ်ရင်းနှင့် တောကျီးကန်းတပ်ရင်းတို့ ပူးပေါင်းကာ တိုက်ခိုက်ခဲ့ခြင်းဖြစ်ပြီး ပြီးခဲ့သည့်ဇွန်လ ၂၃ ရက် နေ့က ကျဆုံးသွားသော ရဲဘော်ကျော်စွာအား ဂုဏ်ပြုသောအားဖြင့် ‘ကျော်စွာ’ စစ်ဆင်ရေးအဖြစ် သတ်မှတ်ကာ တိုက်ခိုက်ခဲ့ခြင်းဖြစ်ကြောင်း သိရသည်။
Thanlwin Myanmar Media
