သဲကုန်းမြို့မှ ကား ၂ စီးထွက်လာသော စစ်သားများကို မိုင်းဆွဲတိုက်ခိုက်မှု စစ်သား ၃ ဦးသေဆုံး
သံလွင်မြန်မာသတင်း
ဇွန်လ ၁၂
ပဲခူးတိုင်း၊ သဲကုန်းမြို့နယ်၊ ရုံးပင်တက်ကျေးရွာအနီးရှိ ဆည်မြောင်းရေလွှတ်ဘောင်ပေါ်တွင် စစ်တပ် ကား ၂ စီးကို မိုင်းဆွဲတိုက်ခိုက်ခဲ့ရာ စစ်သား ၃ ဦးသေဆုံးခဲ့ကြောင်း ပြည်ခရိုင်ပကဖထံမှ သိရသည်။
ယမန်နေ့ ဇွန်လ ၁၁ ရက် နံနက် ၁၀ နာရီ ၁၅ မိနစ်က သဲကုန်းမြို့မှ ကား ၂ စီးဖြင့် ထွက်လာသော အကြမ်းဖက်စစ်သား ၅၀ ခန့်သည် ရုံးပင်တက်ကျေးရွာအနီး ဆည်မြောင်းရေလွှတ်ဘောင်ပေါက်သို့ တက်လာပြီးနောက် ဖိုခနောင့်ဆိုင်ထောင်ထားသော မိုင်းကွင်းအတွင်း ရပ်နားစဉ် မိုင်းဆွဲတိုက်ခိုက်ခဲ့ ကြောင်း သိရသည်။
ထိုသို့ မိုင်းဆွဲတိုက်ခိုက်မှုကြောင့် စစ်သား ၃ ဦးနေရာမှာပင် ပွဲချင်းပြီး သေဆုံးပြီး ၁၁ ဦးအပြင်းအထန် ဒဏ်ရာရရှိကာ အများစုမှာသေဆုံးနိုင်ကြောင်း သိရသည်။
အဆိုပါတိုက်ခိုက်မှုကို သဲကုန်းမြို့နယ်- ပကဖ အဖွဲ့နှင့် ပေါင်းတည်မြို့နယ်- ပကဖအဖွဲ့တို့ ပူးပေါင်း ကာ လုပ်ဆောင်ခဲ့ခြင်းဖြစ်ကြောင်း သိရသည်။
သဲကုန်းမြို့နယ် ပကဖ အဖွဲ့အနေဖြင့် ယခင်ကလည်း ပျူစောထီး သင်တန်းဆင်းပြီး ပြန်လာသော အဖွဲ့ကို တူးမီးဖြင့် ဝင်ရောက်ပစ်ခတ်တိုက်ခိုက်ခဲ့ရာ ပျူစောထီး ၄ ဦးသေဆုံးခဲ့သည်အထိ တိုက်ခိုက် ခဲ့ဖူးကြောင်း သိရသည်။
Thanlwin Myanmar Media
