ကဗျာကဏ္ဍ “ပြည့်စစ်သားတို့ တာဝန်”
ပျိုးကြဲလက်
ငါ့ညီစစ်သား ၊ ရဲမက်များရ
ကြားရဲ့လားကွ ၊ နပခမှာ
ဗုံးချသတ်ပြီ ၊ ယုတ်မာပြီဟေ့ ။
မင်းတို့ရောင်းရင်း အသက်နှင်း၍
လည်စင်းခံတိုက် ၊ စစ်ရှုံးခိုက်ဝယ်
ဝေ့ဝိုက်ပျံဝဲ ၊ လေသူရဲနှင့်
ဗုံးကြဲ၍သတ် ၊ ရန်ငါပြတ်ပြီ
မှတ်ကြနောက်ထပ် ၊ မင်းတို့တပ်ကွယ့် ။
နခခငါး ၊ အကျများ၍
အင်အားနည်းပြီ ၊ ပြတ်သည်ကျည်နှင့်
လာမည်ပြောကာ ၊ ဆေးရိက္ခာက
ဘယ်မှာမသိ ၊ အရာရှိမှာ
ပြေးဘိကြိုရှောင်၊ စစ်သားမောင်တို့
သောင်ပြင်လွှတ်သည့် ခွေးပမာ ။
မင်းတို့အဘ ၊ သမ္မတရူး
သေမထူးက ၊ တပည့်များကို
လူသားမထင် ၊ ကျွန်နယ်မြင်၍
လိုအင်ဆန္ဒ ၊ မပြည့်ဝလျှင်
ဒုက္ခပင်လယ်၊ ဘယ်သို့ကျယ်စေ
ကယ်ရန်ဝေးစွ ၊ ဗုံးတွေချကာ
သူကသတ်ချင် သတ်ဦးမည်။
သေလည်းမထူး ၊ အာဏာရူးနှင့်
ပူးတွဲနေက ၊ မင်းဘဝကို
ငါ့ညီစစ်သား ၊ ပြန်စဉ်းစားကွ
မှားခဲ့သမျှ ၊ မင်းဝန်ချ၍
ဓမ္မဘက်ရပ် ၊ သွေးကြွေးဆပ်ရန်
တပ်နှင့်ပြည်သူ ၊ လက်တွဲကူဟေ့ ။
မင်းတို့ဘဝ ၊ ချမ်းသာရလျက်
သားသမီးနှင့် ၊ ပနံသင့်အောင်
အခွင့်သာက ၊ ဆက်သွယ်ကြ၍
အလံဖြူပြ ၊ လက်နက်ချလျှင်
မင်းကတာဝန် ကျေပါဘိ ။ ။
ပျိုးကြဲလက်
ကဗျာရေးသားချိန် = ၂၀၂၄ ခုနှစ်၊ ဒီဇင်ဘာလ ၁၀ ရက် နံနက် အစောပိုင်း ၁ နာရီ ၄၇ မိနစ်
Thanlwin Myanmar Media
