ပုလဲမြို့ပေါ်ရှိ မြို့မရဲစခန်း၊ ထွေအုပ်ရုံးတို့ကို ဝင်ရောက်တိုက်ခိုက်မှု စစ်သား ၈ ဦးသေဆုံး
D Day News
မတ်လ ၂၉
စစ်ကိုင်းတိုင်း၊ ပုလဲမြို့ပေါ်ရှိ အကြမ်းဖက်စစ်တပ် တပ်စွဲထားသော ပုလဲမြို့မရဲစခန်းနှင့် အထွေ ထွေအုပ်ချုပ်ရေးမှူးရုံးကို ဝင်ရောက်တိုက်ခိုက်ခဲ့ရာ စစ်သား ၈ ဦး သေဆုံးခဲ့ကြောင်း 96 Solider အညာဒေသတပ်ဖွဲ့က ထုတ်ပြန်သည်။
မတ်လ ၂၇ ရက်နံနက် ၈ ခွဲခန့်စတင်၍ အကြမ်းဖက်စစ်သားများတပ်စွဲထားသည့် ပုလဲမြို့မရဲစခန်းနှင့် မြို့နယ် အထွေထွေအုပ်ချုပ်ရေးမှူးရုံးရှိ စစ်သားများကို ပြည်သူ့ကာကွယ်ရေး ပူးပေါင်းတပ်ဖွဲ့မှ ဝင် ရောက်တိုက်ခိုက်ခဲ့ရာ အပြန်အလှန် ပစ်ခတ်တိုက်ပွဲ မွန်းလွဲ ၁ နာရီအထိ ဖြစ်ပွားခဲ့ပြီး စစ်သား ၈ ဦး သေဆုံးကာ ၅ ဦးဒဏ်ရာရရှိခဲ့ကြောင်း သိရသည်။
ယင်းတိုက်ပွဲအတွင်း ပုလဲမြို့ပေါ်ရှိ အကြမ်းဖက်စစ်တပ်ထောက်တိုင် လဝကရုံးအတွင်းမှ ပစ္စည်း အချို့ သိမ်းဆည်း နိုင်ခဲ့ကြောင်း၊ 96 Soldiers – PDF (အညာဒေသ)မှ ရဲဘော် ၃ ဦး (မစိုးရိမ်ရ) ဒဏ်ရာရရှိခဲ့ပြီး ပြည်သူ့ ကာကွယ်ရေး ပူပေါင်းတပ်ဖွဲ့မှ ရဲဘော် ၁ ဦး ထိခိုက်ဒဏ်ရာရရှိခဲ့ကြောင်း သိရသည်။
အဆိုတိုက်ခိုက်မှု ကို 96 Soldiers – PDF(အညာဒေသ)၊ ကျားသစ်နက်တပ်မတော် Black Leopard Army ၊ ယင်းမာပင်ခရိုင် အမှတ် ၁၁ တပ်ရင်း၊ ပခုက္ကူခရိုင် အမှတ် ၁၅ တပ်ရင်း၊ ကျားသစ်နက် တပ် မတော် မြိုင်တပ်ခွဲ ၊ တိုးနယား တပ်ဖွဲ့၊ ယင်းမာပင်ခရိုင် အမှတ် ၁၂ တပ်ရင်း ၊ ယင်းမာပင်ခရိုင် အမှတ် ၂၉ တပ်ရင်း၊ ဒေါင်းမင်း ပြောက်ကျားတပ်ဖွဲ့၊ ဒို့အညာပြောက်ကျားတပ်ဖွဲ့ နှင့် Scarlet တပ်ဖွဲ့ တို့ ပူးပေါင်းကာ တိုက်ခိုက်ခြင်းဖြစ်ကြောင်း သိရသည်။
D Day News
