ကဗျာ ကဏ္ဍ “ပြည့်မေတ္တာ”
ပျိုးကြဲလက်
ဘယ်သူမွေးမွေး ၊ တို့ရင်သွေးဟဲ့
လူလေးတို့ရ ၊ စားကြစားကြ
စားကြပါကွယ့် ၊ ထည့်ကြကွယ့် ။
ဟဲ့ဟဲ့ငွေခင် ၊ အိမ်ထဲဝင်ကြည့်
မြင်မြင်သမျှ ၊ စားသုံးရလျှင်
ထုပ်ဟပိုးဟ ၊ ထည့်ပေးကြကွယ့် ။
ဒီမယ်ယောင်္ကျား ၊ တော့်မယားက
စိတ်အားထက်သန် ၊ တော်လှန်ရန်ဟု
နားပန်လက်ဝတ် ၊ အစုံချွတ်၍
မြေလွတ်ကုန်ပေါ့ ၊ လှူသတော့် ။
ထပ်လှူဖို့နော် ၊ ဆရာတော်နှင့်
တော်၏ဆေးဖိုး ၊ သည်နှစ်မျိုးသာ
ခြိုးခြံချွေတာ ၊ စုခဲ့ရာမှ
ကျုပ်မှာလက်ရှိ ၊ ပိုင်ဆိုင်၏ ။
ဆရာတော်က ၊ တို့ဒါနကို
ခေတ္တငြင်းဆန် ၊ လက်မခံဘူး
ပြည့်ရန်ကင်းဝေး ၊ ရပ်ရွာအေးမှ
ဖြည်းဖြည်းလှူကြ ၊ လာခဲ့ကြတဲ့ ။
ရေရှည်စွဲစား ၊ ခေတ်ဆေးဝါးလည်း
နား၍နဂို ၊ ဆေးမြီးတိုနှင့်
ငါ့ကိုကုသ ၊ ငွေပိုရလျှင်
လှူရတန်းရ ၊ တော်လှန်ကြမည်
တွေးဆလို့ပင် ၊ ကြည်နူးချင်၏
ငွေခင်ဝယ်ဟဲ့ ၊ ထုပ်ပိုးခဲ့ဟေ့ ။
ဟုတ်ကဲ့ပါတော် ၊ အားလုံးခေါ်ပြီ
ငယ်ဖော်ရောင်းရင်း ၊ သူငယ်ချင်းတို့
ချက်ခြင်းလာကြ ၊ လိုက်ခဲ့ကြဟေ့
မတထောင်ဘွား ၊ ဇာနည်များကို
စားရဝတ်ရ ၊ လွယ်ကူကြစေ
သွားရလာရ ၊ ချောမွေ့ကြစေ
တို့ကအားပေး ၊ ထောက်ပံ့ကျွေးမည်
စျေးဝယ်သွားစို့ ၊ သွားကြစို့ဟေ့ ။ ။
ပျိုးကြဲလက်
ရေးသားချိန် = ၂၀၂၂ ခုနှစ်၊ ဩဂုတ်လ ၂၆ ရက် ည ၁၁ နာရီ ၁၇ မိနစ်
D Day News
