သံလွင်မြန်မာသတင်း
အောက်တိုဘာလ ၅
KNU – ကရင်အမျိုးသား အစည်းအရုံး၊ ကော်သူးလေ အုပ်ချုပ်နယ်မြေအတွင်း၌ အကြမ်းဖက်စစ်တပ် က လေကြောင်း၊ လက်နက်ကြီးများဖြင့် တိုက်ခိုက်မှုကြောင့် ကျောင်းသား၊ ကျောင်းသူ ၁၅ ဦး သေ ဆုံးကာ စာသင်ကျောင်းပေါင်း ၁၈ ကျောင်း ပျက်စီးခဲ့ကြောင်း KNU ဗဟို သတင်းနှင့်ပြန်ကြားရေး ဌာနက ထုတ်ပြန်သည်။
၂၀၂၅ ခုနှစ်၊ ဇန်နဝါရီလမှ စက်တင်ဘာလအထိ ကော်သူးလေအုပ်ချုပ်နယ်မြေအတွင်းရှိ စာသင် ကျောင်းများကို အကြမ်းဖက်စစ်ကောင်စီတပ်က ပစ်မှတ်ထား၍ လေကြောင်း၊ လက်နက်ကြီးများ ဖြင့် တိုက်ခိုက်မှုကြောင့် ကျောင်းသား၊ ကျောင်းသူ ၁၅ ဦးသေဆုံးပြီး ကျောင်းသား၊ ကျောင်းသူ ၃၆ ဦး၊ ဆရာ၊ ဆရာမ ၂ ဦး ဒဏ်ရာရရှိခဲ့ကြောင်း၊ ထို့အပြင် စာသင်ကျောင်းပေါင်း ၁၈ ကျောင်း ထိခိုက် ပျက်စီးခဲ့ကြောင်း သိရသည်။
၂၀၂၅–၂၀၂၆ ပညာသင်နှစ်အတွင်း ကရင် ပညာရေးနှင့် ယဉ်ကျေးမှုဌာန (K.E.C.D) မှ ဦးဆောင်ကာ ကော်သူးလေ အုပ်ချုပ်နယ်မြေရှိ စာသင်ကျောင်းပေါင်း ၁,၇၃၈ ကျောင်းကို ဖွင့်လှစ်ထား၍ ကျောင်း သား၊ ကျောင်းသူပေါင်း ၁၄၉,၇၆၂ ဦးအတွက် ဆရာ၊ ဆရာမပေါင်း ၁၁,၉၃၉ ဦးခန့်ထားကာ သင် ကြားပို့ချလျက်ရှိကြောင်း သိရသည်။
ထိုသို့ ပညာသင်ကြားနေရသော ကျောင်းသား၊ ကျောင်းသူများ ၊ ဆရာ၊ ဆရာမများအနေဖြင့် အ ကြမ်းဖက်စစ်ကောင်စီတပ်က စာသင်ကျောင်းများကို ပစ်မှတ်ထားကာ ရည်ရွယ်ချက်ရှိရှိဖြင့် လေကြောင်း၊ လက်နက်ကြီးများဖြင့် အဆက်မပြတ် တိုက်ခိုက် လျက်ရှိသောကြောင့် ကြောက်ရွံ့စွာ ပညာသင်ကြားနေရကြောင်း KNU ဗဟိုက ယနေ့ အောက်တိုဘာလ ၅ ရက်နေ့တွင် ကျရောက်သည့် ကမ္ဘာ့ဆရာနေ့ အထိမ်းအမှတ် ထုတ်ပြန်ချက်တွင် ပြောဆိုထားသည်။
ထို့ကြောင့် ကော်သူးလေ အုပ်ချုပ်နယ်မြေများအတွင်းရှိ ကျောင်းဆရာ၊ ဆရာမများနှင့် ကျောင်းသား၊ ကျောင်းသူများ လွတ်လပ်စွာ ပညာသင်ကြားခွင့်ရရှိရေးနှင့် အသက်အန္တရာယ် စိုးရိမ်ရမှုများမှ ကင်း လွတ်စေရန်အတွက် ကူညီပေးကြပါရန်နှင့် စစ်အာဏာရှင်အုပ်စုကို ၎င်းတို့ ကျူးလွန်ခဲ့သည့် ပြစ်မှု များအတွက် ဖိအားပေးမှုနှင့် အရေးယူမှုများ ဆောင်ရွက်ပေးရန် နိုင်ငံတကာအဖွဲ့အစည်းများ၊ အရပ် ဖက်အဖွဲ့အစည်းများကို ကေအဲန် ယူ–ကရင်အမျိုးသားအစည်းအရုံးမှ တိုက်တွန်းထားသည်။
Thanlwin Myanmar Media
