သံလွင်မြန်သတင်း
စက်တင်ဘာလ ၁၁
စစ်ကိုင်းတိုင်း၊ ကလေးမြို့နယ်၊ နန်းစောင်းပုရွာသစ်သို့ ဝင်ရောက်လာသော အကြမ်းဖက်စစ်တပ် စစ်ကြောင်းကို တိုက်ခိုက်ခဲ့ရာ စစ်သား ၄ ဦး သေဆုံးပြီး စစ်သားနှင့် အိန္ဒိယနိုင်ငံသား ကသည်း သူပုန်အပါအဝင် ၇ ဦး ဖမ်းဆီးရရှိ ခဲ့ကြောင်း အမှတ် ၁ စစ်ဒေသက ထုတ်ပြန်သည်။
စက်တင်ဘာလ ၂ ရက်နေ့က ကလေးမြို့နယ်၊ နန်းစောင်းပုရွာသစ်သို့ ထိုးစစ်စင်လာသော အကြမ်း ဖက် စစ်ကော်မရှင်အဖွဲ့အား ပြည်သူ့ကာကွယ်ရေးပူးပေါင်းတပ်ဖွဲ့ဝင်များမှ တိုက်ခိုက်ခဲ့ရာ စစ်သား အလောင်း ၄ လောင်း၊ စစ်သားနှင့် အိန္ဒိယနိုင်ငံသား ကသည်းသူပုန်အပါအဝင် စစ်သုံ့ပန်း ၇ ဦးတို့ကို ဖမ်းဆီးရရှိခဲ့ကြောင်း သိရသည်။
ထို့အပြင် MA-1 အမျိုးအစား သေနတ် ၃ လက်၊ MA-3 အမျိုးအစား သေနတ် ၁ လက်၊ MA-11 အမျိုး အစား သေနတ် ၁ လက်၊ 7.62 ကျည် ၂၇၇ တောင့်၊ 5.56 ကျည် ၈၉ တောင့်၊ RPG ဗုံးသီး ၁ လုံး၊ RPG ပို့ယမ်း ၃ ခု၊ နင်းမိုင်း ၁၂ ခု၊ မိုင်းရှင်းစက် ၁ ခု၊ ကျည်အိမ်မျိုးစုံ ၁၉ ခုနှင့် မူးယစ်ဆေး အမျိုးအစား ၃ မျိုးတို့ကို သိမ်းဆည်းရရှိခဲ့ကြောင်း သိရသည်။
ယင်းအကြမ်းဖက်စစ်တပ်စစ်ကြောင်းသည် အကြမ်းဖက်စစ်ကော်မရှင်၏ ဒကစ (ကလေး) လက် အောက်ခံ တတက -၁၀ မှ ဗိုလ်မှူး ရဲမျိုးမင်းနှင့် ဗိုလ်ကြီး ပြည့်ဖြိုးအောင်၊ ဗိုလ်ကြီး နိုင်းဝင်းစိုးတို့ ဦးစီးသည့် ခမရ ၃၆၁၊ ၃၆၂၊ ၃၆၃ ၊ ဆသရ-၆ ၊ ခလရ ၈၇၊ ၂၂၉ ၊ SNA၊ အိန္ဒိယနိုင်ငံသားများဖြစ်သည့် ကသည်း (ULFA)နှင့် နာဂ (NSCN) သူပုန်တပ်ဖွဲ့တို့ ပူးပေါင်းထားသည့် စစ်ကြောင်းဖြစ်ပြီး အင်အား ၁၃၀ ခန့် ရှိကြောင်း သိရသည်။
အဆိုပါ တိုက်ခိုက်မှုကို ကလေးခရိုင် ကွပ်ကဲရေးမှူး ဦးစီးသည့် ကလေးခရိုင် အမှတ် ၁၊ ၃၊ ၄ တပ် ရင်း၊ အထူးလှုပ်ရှား ၅၊ ၆ တပ်ရင်း၊ ကလေးမြို့နယ် ပကဖ၊ ကလေးဝမြို့နယ် ပကဖ၊ မင်းကင်းမြို့နယ် ပကဖ၊ ကလေးခရိုင် အထူးစစ်ကြောင်း၊ ကလေးမြို့နယ် ပြည်သူ့လုံခြုံရေးတပ်ဖွဲ့ (ပလဖ) နှင့် Zoland PDF အဖွဲ့တို့ ပူးပေါင်းကာ တိုက်ခိုက်ခဲ့ခြင်းဖြစ်ကြောင်း သိရသည်။
တိုက်ပွဲအတွင်း စစ်ကော်မရှင်ဘက်မှ လက်နက်ကြီးများဖြင့် ပစ်ခတ်ခြင်း၊ ဒရုန်းများဖြင့် ဗုံးကြဲတိုက် ခိုက်ခြင်းများအား နေ့စဉ်ပြုလုပ်ခဲ့ပြီး လေကြောင်း တိုက်ခိုက်မှုလည်း ပြုလုပ်ခဲ့ကြောင်း သိရ သည်။
စစ်ကော်မရှင်သည် ကလေးခရိုင်အတွင်း၌ အိန္ဒိယ နိုင်ငံသားများဖြစ်သည့် ကသည်း (ULFA)နှင့် နာဂ (NSCN) သူပုန်တပ်ဖွဲ့များအား ယခုနှစ် ဩဂုတ်လမှ စတင်အသုံးပြုခဲ့ခြင်းဖြစ်ပြီး ၎င်းအဖွဲ့များ သည် ဩဂုတ်လအတွင်း ချင်းတွင်းမြစ်ကြောင်းအတိုင်း ခန္တီးခရိုင်အတွင်းမှစုန်ဆင်းလာသော သင်္ဘော များဖြင့် ပါလာခဲ့ခြင်းဖြစ်ကြောင်း သိရသည်။
ယင်းအကြမ်းဖက်စစ်တပ် စစ်ကြောင်းသည် ဩဂုတ် (၆) ရက်နေ့မှ စတင်ကာ ထိုးစစ်ဆင် တိုက်ခိုက် လာခြင်းဖြစ်ပြီး ဩဂုတ်လ ၁၅ ရက်ကလည်း စစ်သား အလောင်း ၃ လောင်း၊ စစ်သုံ့ပန်း ၁ ဦးနှင့်အတူ လက်နက်မျိုးစုံ ၁၀ လက် သိမ်းဆည်းရရှိခဲ့ကြောင်း သိရသည်။
Thanlwin Myanmar Media
