သံလွင်မြန်မာသတင်း
စက်တင်ဘာလ ၅
တနင်္သာရီတိုင်း၊ ထားဝယ်မြို့သို့ ရေကြောင်းအတိုင်း ဆန်တက်လာသော စစ်တပ် စက်လှေတစ်စီးကို တိုက်ခိုက်ခဲ့ရာ စက်လှေနစ်မြှုပ်သွားပြီးစက်လှေပေါ်ပါ စစ်သား ၅၀ ကျော်သေဆုံးခဲ့ကြောင်း Special Guerrilla Force – အထူးပြောက်ကျားတပ်ဖွဲ့က ထုတ်ပြန်သည်။
ပြီးခဲ့သည့် ဇွန်လ ၉ ရက် မွန်းတည့် ၁၂ နာရီ ၄၀ မိနစ်က လောင်းလုံးမြို့နယ်၊ ကျောက်နီမော်ကျေးရွာ မှ ထားဝယ်မြစ်ကြောင်းအတိုင်း ထားဝယ်မြို့သို့ ဆန်တက်လာသော အကြမ်းဖက်စစ်ကောင်စီတပ်၏ စက်လှေငယ် တစ်စီးကို တော်လှန်ရေးပူးပေါင်းတပ်ဖွဲ့မှ RPG ၊ လက်နက်ငယ်များဖြင့် ကြားဖြတ်ကာ ပစ်ခတ်တိုက်ခိုက်ခဲ့ကြောင်း သိရသည်။
ထို့သို့ တိုက်ခိုက်မှုအတွင်း စက်လှေမှာ နေရာမှာပင် ထိမှန်ပျက်စီး၍ နစ်မြှုပ်သွားခဲ့ပြီး စက်လှေပေါ်ပါ စစ်သား၊ ပျူ ၅၀ ကျော် သေဆုံးကာ ထိခိုက်ဒဏ်ရာရရှိသူများလည်း ရှိခဲ့ကြောင်း သိရသည်။
အဆိုပါ တိုက်ခိုက်မှုကို Special Guerrilla Force အထူးပြောက်ကျားတပ်ဖွဲ့ နှင့် ပင်လယ်ကြယ် တပ်ဖွဲ့တို့ ပူးပေါင်းကာတိုက်ခိုက်ခဲ့ခြင်းဖြစ်ပြီး တော်လှန်ရေးတပ်ဖွဲ့ဝင်များ အထိအခိုက်မရှိ ပြန်လည် ဆုတ်ခွာနိုင်ခဲ့ကြောင်း သိရသည်။
Thanlwin Myanmar Media
