ဖရူဆိုမြို့နယ်ရှိ လက်ကျန်တပ်ရင်းများနှင့် အမှတ် ၁၄ တန်းမြင့်လေ့ကျင့်ရေး သင်တန်းကျောင်းထဲသို့ စစ်တပ်က လေကြောင်း ဖြင့် လက်နက်ခဲယမ်များဖြည့်တင်း (ရုပ်သံ)

သံလွင်မြန်မာသတင်း

ဩဂုတ်လ ၂

ကရင်နီပြည်၊ ဖရူဆိုမြို့နယ်အတွင်းရှိ လက်ကျန်တပ်ရင်းများနှင့် အမှတ် ၁၄ တန်းမြင့်လေ့ကျင့်ရေး သင်တန်း ကျောင်းထဲသို့ စစ်တပ်က လေကြောင်းဖြင့် လက်နက်ခဲယမ်းများ ဖြည့်တင်းခဲ့ကြောင်း KNDF ဗဟို သတင်းနှင့် ပြန် ကြားရေး ဌာနက ထုတ်ပြန်သည်။

ဇူလိုင်လ ၃၁ ရက် မွန်းလွဲ ၁ နာရီ ၃၀ မိနစ်အချိန်ခန့်မှ ညနေ ၃ နာရီအချိန်အထိ ဖရူဆိုမြို့တွင်းရှိ တပ်စခန်းများနှင့် လောဂျာကျေးရွာအနီး အခြေစိုက်ထားသော အမှတ် ၁၄ တန်းမြင့်စစ်လေ့ကျင့်ရေး ကျောင်းထဲသို့ စစ်ကောင်စီတပ်က သယ်ယူပို့ဆောင်ရေး လေယာဉ်ဖြင့် လက်နက်ခဲယမ်းများ ၊ ရိက္ခာ ပစ္စည်းများအား လေထီးဖြင့် ပစ်ချပေးခဲ့ကြောင်း သိရသည်။

အလားတူ ဇူလိုင်လ ၈ ရက်၊ ၁၉ ရက်နေ့တို့ကလည်း ဖရူဆိုမြို့နယ်အတွင်းရှိ စစ်ကောင်စီတပ် များအတွင်းသို့ လေကြောင်းဖြင့် လက်နက်ခဲယမ်း ၊ ရိက္ခာပစ္စည်းများအား လေထီးဖြင့်ပစ်ချ၍ ဖြည့်တင်းခဲ့မှုများရှိကြောင်း သိရသည်။

ထိုသို့ လက်နက်ခဲယမ်းများဖြည့်တင်းပြီးနောက် အနီးအနားရှိ ကျေးရွာများအား လက်နက်ကြီးများ ဖြင့် ပစ်ခတ်တိုက်ခိုက်မှုများ ရှိလာနိုင်သောကြောင့် မိဘပြည်သူများအနေဖြင့် စစ်ရေး ၊ လုံခြုံရေး သတိရှိစွာဖြင့် သွားလာနေထိုင်ပေးကြပါရန် ကရင်နီအမျိုးသားများကာကွယ်ရေးတပ်- KNDF ဗဟို သတင်းနှင့်ပြန်ကြားရေးဌာနက မေတ္တာရပ်ခံထားသည်။

Thanlwin Myanmar Media