ဧရာဝတီမြစ်အတိုင်း ဆန်တက်လာသော စစ်တပ်သင်္ဘောများကို တိုက်ခိုက်မှု ၂ စီး မီးလောင်ပျက်စီး၊ ၂ စီးနစ်မြုပ် (ရုပ်သံ)
သံလွင်မြန်မာသတင်း
ဇူလိုင်လ ၂၃
မန္တလေးမြို့၊ ဂေါဝိန်ဆိပ်ကမ်းမှ ဧရာဝတီမြစ်အတိုင်း ဆန်တက်လာသော စစ်တပ် သင်္ဘောမျးကို တိုက်ခိုက်ခဲ့ရာ ၂ စီးမီးလောင်ပျက်စီးပြီး ၂ စီးနစ်မြှုပ်ကာ စစ်သား ၅ ဦးသေဆုံးခဲ့ကြောင်း NUG ကာကွယ်ရေးဝန်ကြီးဌာန ထံက ထုတ်ပြန်သည်။
ဇူလိုင်လ ၁၇ ရက်နေ့က မန္တလေးမြို့၊ ဂေါဝိန်ဆိပ်ကမ်းမှတဆင့် ဧရာဝတီမြစ်ကြောင်းအတိုင်း ဆန် တက်လာသော စစ်သင်္ဘော ၁၇ စီးပါ စစ်ကောင်စီ၏ ရေယာဉ်တန်းကို သပိတ်ကျင်းမြို့နယ်၊ ချောင်း သလဲကျေးရွာနှင့် ကျောက်ကြီးကျေးရွာ ဇတ်ဆိပ်ကြားနေရာအရောက် မိုင်းဆွဲပစ်ခတ်တိုက်ခိုက်ခဲ့ရာ သင်္ဘော၂ စီး မီးလောင်ပျက်စီး နစ်မြုပ်ပြီး ၂ စီး ဆက်လက် မမောင်းနိုင်တော့သည်အထိ ပျက်စီးသွား ကြောင်း၊ ထို့အပြင် စစ်ကောင်စီတပ်သား ၅ ဦးသေဆုံးခဲ့ပြီး ၂၁ ဦး ထိခိုက်ဒဏ်ရာရရှိခဲ့ကြောင်း သိရ သည်။
စစ်သင်္ဘော ၁ စီးနစ်မြုပ်သွားချိန်တွင် ယင်းစစ်သင်္ဘောမှ စစ်သားများမှာ အခြားစစ်သင်္ဘော ၁ စီးပေါ် သို့ အပြေးအလွှား ခုန်တက်ကြသည်ကို လည်း မြင်တွေ့ရသည်ဟု ဆိုသည်။
အဆိုပါ တိုက်ခိုက်မှုကို မန္တလေးတိုင်းစစ်ဌာန၏ ကွပ်ကဲမှုအောက်ရှိ ပြင်ဦးလွင်ခရိုင်စစ်ဌာန ကွပ်ကဲမှု ဖြင့် ပြည်သူ့ကာကွယ်ရေးတပ်မတော် – PDF ၅၀၉ တပ်ရင်း၊ ပြင်ဦးလွင်ခရိုင်တပ်ရင်းများ၊ မိုးကုတ် ဗျုဟာ၊ သပိတ်ကျင်းတိုက်နယ်(ပကဖ)၊ မြိုင်မြို့နယ်(ပကဖ)၊ မန္တလေးတိုင်းလက်နက်ကြီးတပ်ဖွဲ့ နှင့် မဟာမိတ်တပ်များက ဧရာဝတီပူးပေါင်းစစ်ကြောင်း အဖြစ် စစ်ဆင်တိုက်ခိုက်ခဲ့ခြင်းဖြစ်ကြောင်း သိရသည်။
ဧရာ၀တီမြစ်ကြောင်း အထက်သို့ ဆန်တက်လာနေသော စစ်သင်္ဘောများကို တိုက်လေယာဉ်များ၊ ရဟတ်ယာဉ်များဖြင့် ကောင်းကင်မှ လုံခြုံရေးယူ၍ လိုက်ပါပေးနေကြောင်း၊ လေကြောင်းဖြင့် ဗုံးကြဲ တိုက်ခိုက်မှုများကိုလည်း လုပ်ဆောင်လျက်ရှိကြောင်း သိရသည်။
