ညောင်ဦးနှင့် တောင်သာမြို့နယ်တွင်စစ်တပ်စစ်ကြောင်းထိုးကို တိုက်ခိုက်မှု စစ်သား ၄၀ ဦး ထက်မနည်းသေဆုံးပြီး PDF တပ်ဖွဲ့ဝင် ၁၁ ဦးကျဆုံး (ရုပ်သံ)
သံလွင်မြန်မာသတင်း
ဇူလိုင်လ ၁၂
မန္တလေးတိုင်း၊ ညောင်ဦးမြို့နယ်နှင့် တောင်သာမြို့နယ်တို့တွင် စစ်တပ်စစ်ကြောင်းကို တိုက်ခိုက်ခဲ့ရာ စစ်သား ၄၀ ဦးထက်မနည်းသေဆုံးပြီး PDF တပ်ဖွဲ့ဝင် ၁၁ ဦးကျဆုံးခဲ့ကြောင်း Popa Production & Guerilla Force – PPGF တပ်ဖွဲ့က ထုတ်ပြန်သည်။
ဇွန်လ ၂၆ ရက်နေ့က ညောင်ဦးမြို့နယ်နှင့် တောင်သာမြို့နယ် အတွင်းရှိ ကျေးရွာများကို စစ်ကြောင်း ထိုးနေသည့် စစ်ကောင်စီ တပ်သားများက ကင်းဇလုပ်ရွာကို မီးရှို့နေစဉ် Popa-PGF တပ်ဖွဲ့နှင့်အတူ မဟာမိတ်တပ်ဖွဲ့များက ပိတ်ဆို့ တိုက်ခိုက်ခဲ့ရာ စစ်တပ်ဘက်မှ MI-35 ရဟတ်ယာဉ်ဖြင့် ၃ ကြိမ် ပစ်ကူပေး တိုက်ခိုက်ခဲ့ကြောင်း သိရသည်။
ယင်းထိတွေ့ တိုက်ပွဲအတွင်း စစ်ကောင်စီ တပ်သား ၃၀ ဦးထက်မနည်း ထိခိုက်သေဆုံဂကာ ၎င်းတို့ ထံမှ ၆၀ မမ ဗုံးသီးများ၊ RPG ထိပ်ဖူးများ သိမ်းဆည်းရရှိခဲ့ကြောင်း သိရသည်။
ဇူလိုင်လ ၁ ရက်နေ့တွင် မောင်းဂွတ်တောရွာကို မီးရှို့နေသော အကြမ်းဖက် စစ်ကောင်စီ တပ်သား များကို Popa-PGF တပ်ဖွဲ့နှင့် မဟာမိတ် တပ်ပေါင်းစုများက ထပ်မံ ဝင်ရောက် တိုက်ခိုက်ခဲ့ရာ စစ် ကောင်စီ တပ်သား ၃ ဦး ထိခိုက်ဒဏ်ရာရရှိကာ ထွက်ပြေးလွတ်မြောက်သွားကြောင်း၊ ထို့နောက် ရွာ ပုလဲကျေးရွာကို မီးရှို့နေသည့် စစ်ကြောင်းနှင့် သွားရောက်ပူးပေါင်းခဲ့ကြောင်း သိရသည်။
ဇူလိုင်လ ၂ ရက်နေ့တွင် တောင်တောကျေးရွာကို မီးရှို့နေသည့် အကြမ်းဖက် စစ်တပ်ကို Popa-PGF အရံတပ်စိတ်မှ မဟာမိတ်အဖွဲ့များဖြင့် ပူးပေါင်းပြီး သွားရောက် တိုက်ခိုက်ခဲ့ရာ စစ်ကောင်စီ တပ် သား ၁၀ ဦးသေဆုံးပြီး တော်လှန်ရေး တပ်ဖွဲ့များဘက်မှလည်း ရဲဘော် ၁၁ ဦးကျဆုံးကာ ရဲဘော် ၅ ဦး ထိခိုက် ဒဏ်ရာရရှိကြောင်း MA-1 မောင်းပြန် ၂ လက်နှင့် ပြောင်းချော ၁ လက် ဆုံးရှုံးခဲ့ကြောင်း သိရသည်။
“စခ အလောင်းတွေကို ကားတွေနဲ့ လာတိုက်သွားတာ ဒဏ်ရာရတာတွေကော အလောင်းတွေကော သယ်ထုတ်သွားပါတယ်။ ကျွန်တော်တို့တွေ အသက်ပေးကာကွယ်ပေးနေသလို ပြည်သူလူထုအနေနဲ့ လည်း သတင်းကစလို့ ခဲယမ်းလက်နက်များလည်း ပံ့ပိုးဖြည့်တင်းပေးကြဖို့ တိုက်တွန်းလိုပါတယ်” ဟု Popa Production & Guerilla Force – PPGF အဖွဲ့မှ တာဝန်ရှိသူ တစ်ဦးက ပြောကြားသည်။
Thanlwin Myanmar Media
