ပုလဲမြို့နယ်တွင် ပစ်ချခံရပြီး လေယာဉ် မီးလောင်ပျက်စီးမှုအတွင်း လေယာဉ်မှူးအလောင်း အပါ အဝင် ရုပ်အလောင်း ၄ လောင်းတွေ့ရှိ
သံလွင်မြန်မာသတင်း
ဇွန်လ ၁၁
စစ်ကိုင်းတိုင်း၊ ပုလဲမြို့နယ်တွင် ပစ်ချခံရပြီး လေယာဉ် မီးလောင်ပျက်စီးမှုအတွင်း လေယာဉ်မှူး အပါအဝင် ရုပ်အလောင်း ၄ လောင်းတွေ့ရှိထားကြောင်း ပြည်သူ့လွတ်မြောက်ရေးတပ်မတော် (PLA) တပ်ဖွဲ့က ထုတ်ပြန်သည်။
ယမန်နေ့ ဇွန်လ ၁၀ ရက် မွန်းတည့် ၁၂ နာရီ ၁၅ မိနစ်က ပုလဲမြိုနယ်၊ ကန့်ဒေါင့်စခန်းသိမ်း တိုက်ပွဲ ပစ်ကူပေးရန် လာရောက်တိုက် အကြမ်းဖက်စစ်ကောင်စီ၏ ဂျက်ဖိုက်တာ တိုက်လေယာဉ် တစ်စီးကို ပြည်သူ့လွတ်မြောက်ရေးတပ်မတော် – PLA မှ ပစ်ချခဲ့ရာ ကျေးရွာတစ်ရွာအတွင်း ထိုးစိုက်ဆင်းသွား ပြီး နေအိမ် တစ်လုံးနှင့်အတူ မီးလောင်ပျက်စီးသွားကြောင်း သိရသည်။
“အလောင်း ၄ လောင်းတော့တွေ့တယ်။ အကုန်လုံးက မီးလောင်ကျွမ်းပျက်စီးနေတဲ့အတွက်ကြောင့် လေယာဉ်မှူးအလောင်းလား၊ လေယာဉ်ပျက်ကျတဲ့ အရပ်သားနေအိမ်ပေါ်က ပြည်သူရဲ့ အလောင်း လားတော့ ခွဲခြားလို့မရသေးဘူး။ အလောင်း ၄ လောင်းတွေ့တာတော့ အတည်ပြုလို့ရပါတယ်” ဟု ပြည်သူ့လွတ်မြောက်ရေးတပ်မတော် (PLA) မှ သတင်းနှင့်ပြန်ကြားရေး တာဝန်ရှိသူ ရဲဘော် နီနီကျော်က ပြောကြားသည်။
ထိုသို့ မီးလောင်ပျက်စီးသွားသည့် နေရာကို ရှင်းလင်းစဉ် လေယာဉ်မှူးရုပ်အလောင်း အပါအဝင် နေအိမ်အတွင်းမှ ရုပ်အလောင်း ၃ လောင်း၊ ခြံဝန်းအတွင်းမှ ရုပ်အလောင်းတစ်လောင်း စုစုပေါင်း ၄ လောင်းတွေ့ရှိထားပြီး ၎င်းရုပ်အလောင်းများမှာ မီးလောင်ကျွမ်းထားသောကြောင့် မည်သူ၊ မည်ဝါ ခွဲခြား၍ မရဟုဆိုသည်။
မီးလောင်ကျွမ်းသွားသည့် လေယာဉ် အမျိုးအစားကိုလည်း အတည်ပြုနိုင်ရန် ကြိုးစားနေဆဲဖြစ်ပြီး ကန်ဒေါင့်ရွာ စစ်ကောင်စီတပ်စခန်းကို ဆက်လက်၍ ထိုးစစ်ဆင်တိုက်ခိုက်လျက်ရှိကြောင်း သိရ သည်။
Thanlwin Myanmar Media
