ကျောက်ကြီးမြို့နယ်၊ ကျွန်းကြီးကျေးရွာ၌ မင်္ဂလာဧည့်ခံပွဲကျင်းပနေစဉ် စစ်တပ်က လေကြောင်းဖြင့် ဗုံးကြဲတိုက်ခိုက်မှု သတိုးသမီးနှင့်ကလေးငယ်များအပါအဝင် ပြည်သူ ၁၀ ဦးသေဆုံး ၂၀ ကျော် ထိခိုက်ဒဏ်ရာရ
သံလွင်မြန်မာသတင်း
မေလ ၂၅
ပဲခူးတိုင်း၊ ကျောက်ကြီးမြို့နယ်၊ ကျွန်းကြီးကျေးရွာတွင် မင်္ဂလာဧည့်ခံပွဲကျင်းပနေစဉ် အကြမ်းဖက် စစ်ကောင်စီတပ်က လေကြောင်းဖြင့် ဗုံးကြဲတိုက်ခိုက်ခဲ့ရာ သတိုးသမီးနှင့်ကလေးငယ်များအပါအဝင် ၁၀ ဦးကျော်သေဆုံးပြီး ၂၀ ဦးကျော်ဒဏ်ရာရရှိခဲ့ကြောင်း တောင်ပိုင်းစစ်ဒေသ၊ အမှတ် ၂ စစ်ဒေသခွဲ က ထုတ်ပြန်သည်။
ယနေ့မေလ ၂၅ ရက် နံနက် ၈ နာရီ ၅၅ မိနစ်က ကျောက်ကြီးမြို့နယ်၊ ကျွန်းကြီးကျေးရွာရှိ မင်္ဂလာ ဧည့်ခံပွဲနေအိမ်ကို အကြမ်းဖက်စစ်ကောင်စီက တိုက်ပွဲဖြစ်ပွားခြင်းမရှိဘဲ လေယာဥ်ဖြင့် ဗုံးကြဲ တိုက် ခိုက်ခဲ့ရာ သတို့သမီးနှင့်ကလေးငယ်များ အပါအဝင် ၁၀ ဦး နေရာတွင် ပွဲချင်းပြီးသေဆုံးပြီး ၂၀ ဦး ကျော်ခန့် ထိခိုက်ဒဏ်ရာများ ရရှိခဲ့ကြောင်း၊ ထို့အပြင် မင်္ဂလာဧည့်ခံကျင်းပသည့် နေအိမ်လည်း ပျက်စီးခဲ့ကြောင်း သိရသည်။
“ဒီမနက် ၈ နာရီ ၅၅ မိနစ်အချိန် ကျွန်းကြီးကျေးရွာထဲမှာ ရှိနေတဲ့ မင်္ဂလာ ဆောင် နေအိမ်ကို လေ ကြောင်းတိုက်ခိုက်မှုလုပ်တာပါ။ ပြည်သူ ၁၀ ဦးသေဆုံးပါတယ်။ ဒဏ်ရာရသူ ၂၀ ဦးကျော်ရှိပါတယ်။ သတို့သမီးလည်း ဆုံးပါတယ်။ ၄ နှစ်အရွယ်နဲ့ ၆ နှစ်အရွယ် ကလေး ၂ ဦးလည်း ဆုံးပါတယ်” ဟု တောင်ပိုင်းတိုင်းစစ်ဒေသ သတင်းရင်းမြစ်က ပြောကြားသည်။
အကြမ်းဖက်စစ်ကောင်စီတပ်သည် တိုက်ပွဲဖြစ်ပွားခြင်းမရှိဘဲ စစ်ရေးပစ်မှတ်မဟုတ်သည့် အရပ် သားပြည်သူများ နေထိုင်ရာကျေးရွာများ၊ လူစည်ကားရာနေရာများကို ရည်ရွယ်ချက်ရှိရှိ ပစ်မှတ်ထား တိုက်ခိုက်ခဲ့ခြင်းဖြစ်ကြောင်း တောင်ပိုင်းစစ်ဒေသ၊ အမှတ် ၂ စစ်ဒေသခွဲက ထုတ်ပြန်ထားသည်။
Thanlwin Myanmar Media
