ကဗျာကဏ္ဍ “ချစ်သူ့စေရာ”
ပျိုးကြဲလက်
ငါ့တပ်မှာ အမှုထမ်းဖို့
လူဖမ်းကွယ့် ရဲဘော် ။
နိုင်ငံတော် ပမာခိုင်းလို့
လူတိုင်းကို ခေါ် ။
လာဘ်လာဘ အကျိုးမျှော်
ငွေမြင်သော် လွှတ်ပေး ။
အခွင့်သာ အခါကျရင်
ဓားပြတိုက်သေး ။
ခါးပိုက်ဆောင် သည်ရဲမက်နဲ့
ရှေ့ဆက်လို့ လျှောက်လိုက်ရင် ။
ရောက်လေရာ ပြည်သူဆဲလို့
သေပွဲကိုဝင် ။
တာဝန်ပေးက အင်တင်တင်
သူ့ဘဝင် မကြည်ဘူး ။
ခွေးကောင်တွေ လက်နက်ချရင်
ငါ့မှာတော့ရူး ။
မဲရှုံးချိန် အာဏာရဖို့
နင်တို့က မြှောက်သလေ ။
စစ်ရှုံးရင် ကိုလူကြောက်တို့
ကိုယ်ရောင်ဖျောက်နေ ။
တပ်ဖျက်တဲ့ ပါတီတွေ
ဝန်ကျေကွယ် မှတ်ထား ။
ငါစေရာ သေနတ်ထမ်းလို့
ရှေ့တန်းကိုသွား ။
တပ်ချစ်သူ နင့်အသက်နဲ့
ဂုဏ်ပျက်ကို ဆည်ဖို့ရာ ။
တို့ပြည်သူ အလိုကျ
ရှေ့ကြွခဲ့ပါ ။
ငါ့ဝန်ထမ်းလဲ မြန်မြန်လာ
ရှေ့တန်းမှာ အမှုထမ်း ။
မေတ္တာရှင် တပ်ချုပ်ကြီးက
ဆီးကြို လက်ကမ်း ။ ။
ပျိုးကြဲလက်
ကဗျာရေးသားချိန် = ၂၀၂၅ ခုနှစ်၊ ဇန်နဝါရီလ ၂၆ ရက် နံနက် ၄ နာရီ ၄ မိနစ်
Thanlwin Myanmar Media
